Overblog Suivre ce blog
Editer l'article Administration Créer mon blog

Recherche

10 octobre 2016 1 10 /10 /octobre /2016 10:00
AN ERBEDER ( Kelc'h Kentan ) - VIII - Brezel ar Groaz - 10 - E Grez Marc'heien ar Bloavezh Mil ( VII ) .
AN ERBEDER ( Kelc'h Kentan ) - VIII - Brezel ar Groaz - 10 - E Grez Marc'heien ar Bloavezh Mil ( VII ) .

Kelc'h Kentan : Da Darzh an Deiz ...

 

 

 

An Erbeder ( VIII )

 

 

 

Trede Lodenn

 

 

/ Brezel ar Groaz /

 

" Un Arouez kevrinus ' zo er Maen ,

   Engravet don 'n e wad tanflamm ... "

   Novalis - " Heinrich Von Ofterdingen ",

   Ar Skarbouklenn .

 

 

- Brezel ar Groaz -

 

 

10 - E Grez Marc'heien ar Bloavezh Mil

         ( Danevell an Tad-Kozh )

 

" Ha setu ma welas ur marc'h gwenn ,

  Hag en doa ur wareg an hini pignet warnan ,

  Roet dezhan ur gurunenn ,

  Hag ez eas kuit 'vel un Trec'her ... "

Diskuliadur , 6 , 3 .

 

 

VII - Ar Steredenn-Lostek hag ar Brezel

       ( Dre Dan pe dre Wad )

 

 

        Un nebeut goude , tra ma farde kenderc'hel danevell hoalus e envorennoù hon fistilher touet , ' oa gwelet o tont brasoc'h un takad bihan-tre e penn an dremmwel .

Saflikan a reas gwagennouigoù bennak ouzh kostezioù al lestr , o kemenn e tostae unan all , seurt bagig-pesketa dre dan a rede a-brez-herr war ar mor hag a roge gant he c'houc'h hirvoan an houloù glas .

Ur banniel gwenn louc'het gant ur groaz ruz-flamm ' veze savet a-us d'ar " Virgo Maria " war he gwern .

Kent en em lakaat a rafent war evezh e teuas er-maez daou vartolod bet gwisket henvel unan hag eben eus kof al lestrad !

Neuze eo ma teuas war wel unan bennak all ur bugel gantan ivez . Mall bras dezhan adkavout e genderv , e stagas Roll , rak en e-unan e oa , da redek o kemer an dreuzellig koad a unane breman an daou vourzh .

      Hag evit a selle ouzh ar boud kevrinus ur c'hougoul war e benn , a seblante par ha parez , yaouank ha kozh , leun a nerzh hag a gizidigezh war un dro , e vije bet diaes da gement hini anavezout e wir reizh ha pezh a guzhe tal enorus an den-se dindan un doare tog du kardinal kurunet ag e guchennoù-blev ken melen . 

Luc'hedennoù a strinke eus e zaoulagad tenval pa sellent garv ' vel ul loen gouez ouzh ar re all a-wechoù , ha pa veze distaolet enno sked he gwalenn-anv a liv ruz-sklaer 'giz tan ar c'huzh-heol , ' veze diskouezet drezo ivez pe beli un Doueez vrezelgar ma vefe ret doujan d'he gwall spered pep unan pe hini ur penngadour nerzhus na vefe den ebet gouest da dalan e gwirionez outan . 

Ha memes !

" Tangern , bez' e rankan larout deoc'h traoù mallus ! "

" Mestrez ... ! Roll ! Petra'ta eo c'hoarvezet deoc'h ? " , ez erbedas an tad-kozh o stouin e zaoulin dirazi .

" Klasket o deus e skrapan an hini eo ...

Ar marc'hadour rusian , a resisaas ar bugel zoken .

      En ul lec'h distro e kambr-lestr ar c'habiten e kendivizas ent prevez ar re vras . Met n'hellas ket Yann mirout ouzh e levenez pa gavas en-dro e vignon ger a-vihanik !

" Penaos e tiskuilhfen-se dit ? , a eilgerias dezhan ar baotr a lugerne bliv gant ur wenvidigezh divent e zaoulagad . Kredin a ran 'm eus adkavet va mamm wirion ! "

     Pa serras an noz veuzet el loargann distanus ha goude ma voe sioulaet pep tra gwech loc'het lestr an Demplourien , e c'hellas adkregin gant e istor Tadig ...

    " ... An alouberien norman o doa lazhadeget kazi holl poblans Dol a zivizas ober o didamalloù dezhi da c'houde !

Neuze em savas a-vern ar gouerien hag ar vro ' oa bet drastet ker spontus c'hoazh betek 1014 gant ur brezel-diabarzh nevez !

Mareadoù tud diniver deut a-ziwar ar maez a zevas kêrioù , kestell ha manerioù , o lakaat d'ar marv gwragez an aotrounien hag o trouklazhan o bugale .

Daoust ma veze re yaouank c'hoazh he mab , hen lakaas Dugez Hawiz , intanvez Jafrez Berengar , da vezan anzavet warlerc'hiad heman . Gant ur maread noblansoù ez emgannas war ar maez armead Breizh o rein lamm dezho ha bout bet lezet nemet gwad ha ludu war he lerc'h !

    Met adarre e savas rendael a-zivout hêrezh Breizh , besterd bennak o tigarezin o lignez uhel da vreutaat ha kavet da abegin diwar gurunenn an dug ... " ( 11 )

    Kent d'en em rein da gousket tamm-ha-tamm ' benn ar fin , e c'hourvezas Roll war ur vatarasenn bet goloet gant lien-gouel daoust da grizderi an darvoudoù-man c'hoarvezet kalz a-raok . Talvezout a rae dezhan moarvat , paourkaezh paotr , bezan deut skuizh-bras gant an trubuilhoù poanius ' oa erruet gantan diagent !

Difrom-kaer ha diflach hervez lusk ingal ar mekanikoù e kendalc'has e gontadenn an ozac'h-meur evelkent .

" ... An hêr-se , a veze diouzh e skrid-bez , " kaer ha brav e gorf , leun a frankiz ha largentez , kalonek ha deol-tre e vennozhioù " , a c'hounezas un drec'hadenn vras kent mervel d'ar c'hentan a viz Here 1040 , kontammet gant e falsvignoned an Norzh !

Rak en un doare ken leal ha didroidell ' oa difachet duged Vreizh ha re Normandi ken ' oa bet fiziet e Alan gant Roparzh an Diaoul o vont kuit d'an Douar Santel e 1034 da c'houarn ha meran e stadoù koulz ha derc'hel a rafe dindan e ward ivez ul labous-garzh ganet diwar an avantur , Gwilherm , a vefe lesanvet " an Alouber " en amzer-da-zont ! ( 12 )

    Koulskoude e steuzias kuit Roparzh 'pad e veaj .

Setu perak ar Brezhon , hag en doa em lakaet da benn e arme , a zivizas kadorian Gwilherm en e lec'h . O terc'hel e bromesa e roas marteze displijadur evel-se d'ar re all a c'hoantae da zont da zug ha na zoujas ket d'en talvezout dezhan o lemel e vuhez digantan

   Neuze e teuas istor doanius ar mab ' oadet a dri miz a-vec'h - ha piv 'oar evit perak ? - ' oa bet skrapet diouzhtu gant an eontr Eozen Pentevr !

A-dra-sur e tizhas dezhan koulskoude Konan II , a zeue dre reizhvali war e lerc'h , ober anzav e wirioù , met pa zeas e amezeg krenv ha galloudus en doa rastellet dioutan an Normandi dre vuntran Alan , e sonjas darn eus an dud e oa aet e benn e belbi !

" Gourc'hemenn a ran dit va resteuler va Douar , pe anez on mennet d'ober brezel dre dan pe dre wad ouzhit ! " , a grias trumm warno hor reder-mor bet dalc'het gant ar c'hoari e zivreder er vann ' pad m'o doa tizhet sklokadennoù e vouezh barroù uhelan dreistdiraez adalek ur son boud betek ur son skrilh ! ( 13 )

   Met evit respont da gement hini nemetken eo bet laret e c'hounezas gant e arc'hant Gwilherm chamberlank Dug Breizh a gontammas d'e dro " korn , lerennoù ha manegoù e vestr ... "

Hed daou kantved ' oa an navet Prins bet lazhet gant an Normaned evel-se !

Neoazh , ne harzhas ket meur a varc'heg da vont kuit da aloubin Bro-Saoz e 1066 , ken sur ' veze pep hini anezho , rak m'oa bet treuzet an oabl gant ur steredenn-lostek a gemenne reveulzioù bras , ' oa bet benniget an aloubadeg-se gant Doue !

 

 

 

 

( Da Vezan Kendalc'het )

 

 

 

                                          ___

 

DAN AR WERN - An Erbeder ( Kentan Kelc'h ) - VIII - Brezel ar Groaz - Trede Lodenn - 10 - E Grez Marc'heien ar Bloavezh Mil - VII - Pep gwir miret strizh - All rights reserved - Tous droits réservés . " An Erbeder " ( Le Passeur Des Mondes ) , copyright 2005 SGDL / Dan Ar Wern hag Arbredor.com 2007 ha 2008 ( Numerical Version ) - Breton Version / E Brezhoneg .

                                  ___

Notennoù :

11 - Hawiz Normandi ( pe Havoise ) , ganet en 977 ha marvet e Roazhon d'an 22 a viz C'hwrevrer 1034 , prinsez norman , merc'h da Richarzh Ian " Dizaon " , dug Normandi , ha d'ur brinsez viking a wad uhel , Gunnor .

Dimezin a reas Jafrez Ian Berengar  , kont Roazhon ha dug Breizh ( 992 - 1008 ) war-dro 996 .

Trederannourez ha lezdugez e oa pa varvas an dug da c'hortoz ken na vije bras a-walc'h o mab Alan III da ren ar vro .

12 - Alan III ( 997 - 1 a viz Here 1040 ) , mab ha warlerc'hiad e dad Jafrez Ian Berengar . " Roue Breizh " e lavare bezan ivez .

13 - Konan II ( 997 - 1 a viz Here 1040 ) , mab ha warlerc'hiad Alan . Rankout a reas em zizober da gentan eus gwardoniezh dic'houzanvus e eontr Eozen Pentevr ( 999 - 1079 ) , enebour Gwilherm Normandi ( 1027 - 1087 ) lesanvet " Ar Bastard " ha goude " An Alouber " .

Mab bastard Roperzh an Diaoul pe " Hollgaer " hag Herleva , e teuas da vezan heman Gwilherm Ian Bro-Saoz goude emgann Hastings ( 14 a viz Here 1066 ) .

AN ERBEDER ( Kelc'h Kentan ) - VIII - Brezel ar Groaz - 10 - E Grez Marc'heien ar Bloavezh Mil ( VII ) .

Partager cet article

Repost 0

commentaires

Articles Récents

Liens