Overblog Suivre ce blog
Editer l'article Administration Créer mon blog

Recherche

4 novembre 2016 5 04 /11 /novembre /2016 10:44
AUBERIVE ( Trede Kelc'h ) - 13 - Dorioù ar Mor-Bras - La Porte Océane - The Ocean Doorway ( 18 ha 19 ) - Breton Version / E Brezhoneg .
AUBERIVE ( Trede Kelc'h ) - 13 - Dorioù ar Mor-Bras - La Porte Océane - The Ocean Doorway ( 18 ha 19 ) - Breton Version / E Brezhoneg .

AUBERIVE ( 13 )

 

 

Dorioù ar Mor-Bras (18 ha19 )

 

( Heuliad " Istor ur Bleinier Laz-Senin " )

" Va Doue , va Aotrou Doue ,

   Perak ez eo ret Deoc'h keit-se ,

   'Vit ma c'hallfen O karout ker ,

   Foeltran bleunioù va nev'zamzer ? "

Francis Jammes - " Frankizennoù en Nenv "

- An Iliz Gwisket gant Delioù ( 17 ) .

 

Pevare Lodenn : E Penn ar Veaj

Da enorin Lhasa de Sela ( 1972 - 2010 )

" I got caught in a storm and carried away ... " *

 

 

Eilvet Devezh

" When the dark night seems endless , please remember me ... "

Loreena McKennitt - " Dante's Prayer " **

 

 

 

 

18 - 'Vel ur flammenn ruz bev c'hoazh dindan ludu tan bras e envorioù e tiflukas ar c'homzoù-se dioutan . 

        Deut e voe trumm da sonj ar beajour al levr kozh troioù-kaer en doa bamet e endervezhioù bugaleaj e bro vurzhudus Marc'heien an Daol-Grenn ...

Kredin a reas advevan un istor dreistkred en doa lennet e ti e eontr gwechall a selle ouzh unan eus e hendadoù aet kuit da Vrezel Vras ar Groaz gant Alan Fergant . ( 17 )

       Goude kemeridigezh Jeruzalem e 1099 evit gwir , ' oa bet an aotrou Brekilien unan er strolladig marc'heien-se a veve bepred en-dro da Jafrez Bouillon , mestr nevez al lec'h .

Evel-se eo e anavezas heman dioutan bezans ur meuriad kantreat a orin eus Petra , gwikadell veurdezus he zemploù maen krag ruz an Nabateaned bet adkavet diwezhatoc'h gant Burckhardt hag e c'hoantaas anezhan ober ur gwel da sujidi e zouaroù tro-war-dro . ( 18 )

       Estreget henn ' oa pal ergerzhadenn ar roue , neoazh , dianatoc'h : bez' edo ur vojenn o redek 'mesk ar bobl , ha majed a gomzas anv eus ur ruzvaen zoken , bet kuzhet en ur c'hev e Kumran , keriadennig ar Mor Marv . ( 19 )

Ha deut ' oa pred un diskuliadur ?

O seizh gwellan o doa graet Ben Jacob ha Myriam e verc'h , mirerien an tenzor , da brientin donedigezh o ostizidi .

Kalz en a-raok ma oant erruet anezho du-se , ' oa bet roet da c'houzout d'an ozhach-meur e vefe poent bras ma kemerfe unan bennak an dorn war e lerc'h .

         E-giz-se eo ma oa bet desevet-tre gant e " Rouanez kevrinus an Traezh " Huon Koadkaden ha deut karantez foll dezhan eviti !

Poanius-mik ' oa bet touellet koulskoude anezhan un deiz ! ( 20 )

 

 

19 - " Hag e c'hellfe gwelout hep spont e zihun an den a sell ouzhoc'h pe a glask ho tivinout ? ", a vouskomz Tristan , haroz kadarn , d'e "Goantenn Vorgousket " .

" Ha mervel a rafe biken hor garantez ? " , en em c'houlenn Pelleaz o krenan 'vit e Velizand d'e dro ... ( 21 )

         A-benn ur sizhun e chomas daou varc'heg hepken war al lec'h . Ha mareadoù a dremenas ...

Gant c'hwezh an nevezamzer o tont goude morz ar goanv , e tiwanas teneridigezh ' vit he c'haredig e spered ar verc'h yaouank : ur bugel a c'hanas dezhi 'ben ar fin .

         Betek-henn ' oa en em roet d'e vestr korf hag ene Riou Lohieg , floc'h feal evitan .

Daoust da se en doa merzet e save enkrez war e spered deiz-ha-deiz , seurt mignoniezh en doa strivet da ziskouez gant kalon da blac'h ar gouelec'h o trein emberr d'ur garantez seul vuioc'h entanet ha distrujus ma veze ret dezhan he derc'hel kuzh ouzh pep hini .

         Marteze muioc'h en abeg d'e anken eget d'e wallc'hoant e reas fall dezhi , o sonjal ne c'hellfe ket trec'hin war ur santad ken tener ha berzet outan ?

Moarvat ivez en doa glabouzet re , o klask dont da dremen e boan dre ar gwin ?

         Ul lazhadeg spontus e oa !

O vuntran an holl gêriadenniz , e vennas skrapan ar maen burzhudus brezelourien , hag evel m'en doa tapet diouzhtu 'hed e c'har an traitour, ne chomas nemet ni hon-daou , me ha va zad hag , o kaout preder da vont en-dro d'e Vreizh , a zeuas a-benn da skoachan legadenn brizius Atlant-Iz en e visac'h memestra ... ( 20 )

 

 

 

 

( Da Vezan Kendalc'het )

 

 

 

                                                   ___

 

DAN AR WERN - Auberive ( Trede Kelc'h ) - 13 - Dorioù ar Mor-Bras -18 ha19 - Kerzu 2004 / Du 2016 - Pep gwir miret strizh - All rights reserved - Tous droits réservés - Breton Version / E Brezhoneg . "Auberive " , copyright 2006 .

                           ___

Notennoù :

17 - "An Erbeder " , Trede Lodenn , XI - Istor Riou Lohieg , I - An Disparti .

18 - "An Erbeder " , Trede Lodenn , XI - Istor Riou Lohieg , III - Ar C'hlask .

- Johann-Ludwig Burckhardt ( 1784 - 1817 ) , lesanvet "Scheich Ibrahim " , ergerzhour reteroniour suis a zizoloas dismantroù Petra e 1812 .

19 - Kevioù Kumran : lec'hienn henoniel o valiran a-us glann-kôrnog ar Mor Marv war diriad istorel ar provins roman Judea . 

20 - "An Erbeder " , Trede Lodenn , XII - Sekred Eozen Ar Ster - Bugaleaj 1 - Ar Gral .

21 - "Tristan " ( 1903 ) , danevell Thomas Mann ( 1875 - 1955 ) , skrivagner alaman , priz Nobel lennegezh 1929 .

"Tristan hag Izold " ( 1945 / 1950 ) , gant Zavier Langleiz ( 1906 - 1975 ) , livour , engraver ha skrivagner breizhat .

"Pelleaz ha Melizand " , c'hoarigan Claude Debussy bet krouet d'an 30 a viz Ebrel 1904 war ul levrenn Maurice Maeterlinck hervez pezh-c'hoari anezhan  ( 1892 ) .

 

Kanennoù* "Rising " , gant Lhasa de Sela ( e "Lhasa " albom , copyright Les Disques Audiogrammes Inc. / Warner Music 2009 ) ha ** "Dante's Prayer " gant Loreena McKennitt ( e "Book of Secrets " albom , copyright Quilan Road Limited / Warner Music 1997 / 2004 ) . All rights reserved .

 

Taolennoù : "Tristan and Izold " ( 1902 ) , "Pelleas and Melisande " ( 1910 ) gant Edmund Blair Leighton ( 1853 - 1922 ) , livour rakrafaelour saoz .

 

 

 

 

AUBERIVE ( Trede Kelc'h ) - 13 - Dorioù ar Mor-Bras - La Porte Océane - The Ocean Doorway ( 18 ha 19 ) - Breton Version / E Brezhoneg .

Partager cet article

Repost 0

commentaires

Articles Récents

Liens