L'Histoire et l'Héritage I - HOLEN MOR VII - Liv an Dazont - 1 - Porzh ar Bromesa .

11 Février 2016 , Rédigé par Dan Ar Wern Publié dans #HOLEN MOR ( L'Histoire et l'Héritage ) - Pensées , Journal , Correspondance .

An Istor hag an Hêrezh I ( L'Histoire et l'Héritage I )

HOLEN MOR VII

VII - Liv an Dazont ( 1 )

1 - Porzh ar Bromesa

( 1992 )

" Pelec'h eman an draonienn evurus ,

Douar hon Promesaoù ? "

Dan Ar Wern - " Douar hon Promesa " * ,

Auberive 8 .

da Vefa de Bellaing ( 1909 - 1998 )

Souezhadennoù ganti ivez a-wechoù eo buhez skuizhus-tre 'vel ma oar pep hini unan bennak ar c'hoskor bourzh dre aer !

A-drugarez d'ar c'homandant en doa c'hoant hon trugarekaat dre ma voemp manet difrom dirak strafuilhoù aergelc'h "burzhudus " an derc'hent , 'm oa lidet en abardaevezh diwar goust hon aerehan eno va daou-ugentvet deiz-ha-bloaz er gwellan preti kegin vat Jaffa .

Hag antronoz vintin da veure un devezh dibenn-hanv ken kaer edon o tremen va amzer da ziskuizhan war draezhenn an Hilton , daoulagad ac'hanon o skein diehan war-zu an donvor .

- Ac'hanta , Bretoned , ma gomprenan mat pezh a fell din laret , 'vel Yuzevien neuze 'maoc'h-c'hwi , a vouskomze din e pleg va skouarn mouezh flour un doare boud-aelez a spine va skoaz em c'hichen pa vezemp o vale war ribl ar mor Kanaan . Eveldomp hoc'h eus ur banniel , ur yezh ha talvoudoù speredel ...

Va mignonez Edith e oa . ( 1 )

- Met a-zivout hon douar ? , a droc'his dezhi neuze , hini bet dilestret ennan goude bet treizhet ar mor Keltiek gant hon hendadoù pell'zo , avel grenv ar Frankiz o c'hwezhan gouelioù o bigi da glask Porzh ar Bromesa : hag e vo dimp evit gwir un deiz , a c'houlennas dezhi ouzhpenn , pe ne oa nemet ur gaou all bet livet war holl levrioù istor mojennel-se ?

- N'hell ket bezan dilennet holl bobloù ar bed ! , a daolas o vousc'hoarzhin goap ouzhin ken glac'harus ar goantenn .

- Ha petra ' larfe Sant Erwan ha Sant Brieg , Sant Paol pe Sant Tudal , diazezourien ha saverien ar Vro , o welout petra eo deut-hi da vezan ?

( 2 )

Petra sonjfe hon harozed ivez , tadoù hor mammvro , Arzhur , Morvan Lez-Breizh , Nevenoe ? ( 3 )

- E kalon holl vammoù a wel o vont kuit o mab da glask penn d'e bred en ur vuhez gwelloc'h e vev ar goanag ... Met pa zistroont d'o c'hêr eo dindan neuz ur goulmig wenn a-wechoù ... ( 4 )

Sell , du-hont , an hini o nijal he-unan-penn a-us d'ar vagig-se : n'eus netra war o zro .

Piv ' oar petra ' vo an dazont ?

O adwelout an deiz war-lerc'h hor banniel o strakal en avel-vor , e tegasas d'am sonj komzoù kevrinus bet klevet iskis ganin 'pad va nozvezh digousk en ostaleri : Petra ' c'h eus graet 'vit da Vro ?

( Da Vezan Kendalc'het )

___

DAN AR WERN - An Istor hag an Hêrezh I - Holen Mor VII - Liv an Dazont - 1 - Porzh ar Bromesa - C'hwevrer 2016 - Pep gwir miret strizh - All rights reserved - Tous droits réservés . " Liv an Dazont " , copyright 2016 - " Holen Mor " , copyright 2013 .

___

Notennoù :

1 - "Aman Hag Ahont " , IV - Edith ha Me .

2 - Sant Erwan Helouri ( 1253 - 1303 ) , patron Breizh ha tri eus ar seizh sant diazezer Breizh ( Brieg , Paol ha Tudal ) .

3 - Arzhur , haroz brezhon an Daol Grenn , Morvan Lez-Breizh , rouez e dibenn an VIIIved kantved , Nevenoe ( war-dro 800 - 851 ) , Tad ar Vro .

4 - Barzaz-Breiz , I , 17 ( An Distro eus a Vro-Saoz ) gant Kervarker ( Beskont Hersart de la Villemarqué , 1815 - 1895 ) , yezhour ha skrivagner breizhat .

Taolenn : " King Arthur " ( 1903 ) gant Charles Ernest Butler ( 1864 - 1933 ) , taolennour saoz .

* An Draonienn Evurus ( Das Glückliche Tal , 1939 ) - Pelec'h eman Douar hon Promesaoù ? ( Alle Wege sind Offen , 1939 - 1940 ) , daou romant bet skrivet gant Annemarie Schwarzenbach ( 1908 - 1942 ) , skrivagnerez-kantreadez suis .

Partager cet article