/fdata%2F0309752%2Favatar.png){kind=avatar}
STUDIOU - II - SPECIAL HALLOWEEN - A-Drenv d'ar Ouel ... - Behind the Veil ... - Derrière le Voile ... Breton Version / E Brezhoneg ( 4 ) .
" And all of these spirit voices rule the night ... " *
Paul Simon
A-Drenv d'ar Ouel ... ( 4 )
VI - Frankiz...
Hervez Léon Denis , e tiskouezhe mat ar Gelted , en o emzalc'h , tro-spered-se ar Frankiz , war un dro e-kenver buhez ensavadurel anezho , diazezet war zilennadegoù demokratel , hag ivez e-kenver o boazioù , lusk o c'halonoù .
Evel eneoù dieub war an Douar int bet skeudennet , hag a nijfe dreist en egor da c'houde ...
Pajennoù kaer-tre a gavomp e levr an oberour diwar o fenn a-hend-all , bet embannet ar wech kentan dres goude e varv e miz Meurzh 1927 .
Re ar pennad pevar , da skouer , gouestlet da Vreizh , ha dreist-holl an arroudenn-man , ma vez komzet brav ennan eus he fobl .
Seblantout a ra bout bet skrivet hiziv an deiz , ken digemm hag henvel-bev ha m' eo chomet atav hor pal , hor hunvre ...
" Hunvreal a reont , evit Breizh , en un emrenerezh a vefe henvel ouzh hini Bro-Gembre , gant he yezh , he lennegezh , he c'hazetennoù .
" Hunvreal a reont en ur Familh grenv , he doareoù glanoc'h , diazezet war an Henvoaz !
" Hunvreal a reont en un unvaniezh strizh gant broioù tramor , keltiek a orin , kevreet dre santad ur blanedenn stroll .
" Mirout a reont ur fizians digemm e tonkad o gouenn ** e don o c'halonoù , e peurdrec'h ar Geltiegezh e pennaennoù dreist anezhi a-benn ar fin : FRANKIZ , REIZHDER , ARAOKAAT ! ( 2 )
ECHU
___
DAN AR WERN - Studioù - II - A-Drenv d'ar Ouel ... ( 4 ) - Here / Du 2005 ha 2020 - Breton Version / E Brezhoneg - Pep gwir miret strizh / All rights reserved / Tous droits réservés . " Studioù " , Copyright 2007 .
* "Spirit Voices " , Paul Simon , in "The Rythm of the Saints " , Warner , 1990 - All rights reserved .
** Talvoudegezh ledan , a-dra-sur , evit un den brokus eveltan .
" Skeudenn ar marv eo momedoù kentan m'en em roomp d'ar c'housked ; ' vel morzet en ur vorenn eo deut hor sonj , ha ne c'hellomp ket spisaat ar poent resis pa gendalc'h ar "me " , en ur stumm all , oberenn e vuhez . "
Gérard de Nerval - "Aurélia " , I , 1 .
STUDIOU - II - SPECIAL HALLOWEEN - A-Drenv d'ar Ouel ... - Behind the Veil ... - Derrière le Voile ... Breton Version / E Brezhoneg ( 3 ) .
A-Drenv d'ar Ouel ... ( 3 )
V - Utopia
Bez' e oa un "utopia " all en naontekvet kantved : hini sokialouriezh Charles Fourier ( 1772 - 1832 ) , damkanour ar "Falanstered "
( Phalansteries ) , kevrennoù ma veze anezho eus ur "Falanks " ( Phalange ) , strolladoù tud a glaske tizhout un uhelvennad o vevan a-gevret en ur gumuniezh labour , seurt "Kibboutz " mod-kozh , mar kavit gwell .
Un diskoulm da enkadennoù don ar gevredigezh ?
Ken reuzeudik , e gwirionez , e oa stad ar vicherourien hag ar gouerien er c'houlz-se , berr alies an traoù hag ar boued ganto , ma veze gwall nec'het o spered gant bec'hiou enkrez warno ha ma glaske an holl d'en em dennan eus an diaesterioù-se gant un doare goanag dezho .
Ha kement a oa bet degouezhet gwall reuziadoù dienez ha naon e pep lec'h , ma darzhas ivez meur a wech taolioù-dispac'h ha reveulzioù gwadek ( 1830 , 1832 , 1848 , ar Gumun ... )
E 1883 , e-pad ur brezegenn e Toloza , e kejas Léon ouzh un den yaouank skolveuriekaet dispar war ar Brederouriezh .
Gwir eo en doa echuet heman e studioù "er memes rummad eget Bergson " , e penn araok ar "Skol Normal " ( 3 ) .
Jaurès 'oa e anv , ha , diouzhtu , e oa bet teoget an daou zen an eil gant egile .
Na zisonjomp ket e oa e barr he brud ar Spiritouriezh er c'houlz-se , hag er c'harterioù gwerinel , " e teue ar c'helc'hioù da vezan ivez oaledoù sevenadurel evit deskin da lenn ha da skrivan da dud ar bobl , pa greizennoù kenskoazell , gant ur reizhiad arc'hant-kred evito . " ( 19 )
Ouzhpenn da se ha goude sellout pizh , e veizer e tiverke un tamm rannadur e renkadoù hor c'hevredigezh menoz an adenkorfadur hag e vefe "ar Relijion nevez "-se re nes d'ar bobl evit an dud a stad uhel , o kinnig dezhi ur c'henaozadur , marteze , re a du ganti .
Ur feiz hegredik e oa da gentan , mesket a drivliadegoù e doare ar Gatoliked , hag a ziskouezhe he doujans evit Doue , pe a gehele ar Werc'hez hag ar Sent evelto .
Met da c'houde e oa skoazellet gant arnodennoù poellek bet sevenet gant tud a skiant .
Ha neuze , he doa graet kement a verzh ar Spiritouriezh evit se ?
Ur gwir abeg , war a gredomp , 'oa he doare meizan menozioù dispar ag araokadenn , a gevatalder etre an dud , ha , dreist-holl , ar plas brasoc'h bet roet ganti d'ar maouezed .
( Da Vezan Kendalc'het )
___
DAN AR WERN - Studioù - II - A-Drenv d'ar Ouel ... ( 3 ) - Here / Du 2005 - Breton Version / E Brezhoneg - Pep gwir miret strizh / All rights reserved / Tous droits réservés . "Studioù " , Copyright 2007 .
___
Notennoù :
19 - "Geriadur Burzhudoù ha Darvoudoù Dreistordinal Kristen " ( Dictionnaire des Miracles et de l' Extraordinaire Chrétien ) , gant Patrick Sbalchierro , Fayard , 2002 .
STUDIOU - II - SPECIAL HALLOWEEN - A-Drenv d'ar Ouel ... - Behind the Veil ... Derrière le Voile ... Breton Version / E Brezhoneg ( 2 ) .
A-Drenv d'ar Ouel ... ( 2 )
IV - Keltiegezh Arnevez
En e levr a-zivout "An Drouiziezh " , e skriv reizh Jean Markale e "seblant ken nebeut henvel lidoù ha kelennadurezh ar sektennoù drouizel arnevez ouzh ar pezh a vez anavet diwar-benn an Drouized gant an Istor hag ar Skiant . " ( 13 )
Koulz all , n'eo nemet d'an triwec'hvet kantved , hini "Ar Sklerijennoù " ken brudet , m'eo bet klevet anv eus krouidigezh un "Druid Order " ( Urzh an Drouizien ) nevezkeltiek gant un den anvet John Toland ( 1669 - 1722 ) , doueelour ha katolig iwerzhonat war un dro . Er memes bloaz 1717 , da genver deiziad ofisiel adc'hanidigezh ar Franmasonerezh , oa bet savet ivez , met tri miz abretoc'h , "Logell Vras "
( obedians ) Londrez : met penaos bennak e c'hallfe bezan kredet e oa erruet tost a-unan "dre zegouezh " an daou darvoud-se ? ( 14 )
E red an amzer , e oa mennet an Iliz da zistruj , kousto pe gousto , pep roud eus an azeulerezh gozh er bobl . E-doug ar pevare kantved ' oa bet avielet Bro-Anjou da skouer dindan warez Martin de Tours , met diarvar , ne oa ket bet graet atav er vro-se gant an "douster " hepken ' vezo ken meulet diwezhatoc'h diwarni gant Du Bellay !
An Impalaer Teodoz , e-unan , a embannas ur skrid , evit ma vefe barnet d'ar marv pep hini a azeulfe c'hoazh an Doueed "pagan " . ( 15 )
Bez' eo ar varzhed-kanerien a Vro-Gembre , koulskoude , evel ma vefe displeget un deiz gant Robert Graves , ar re o deus kendalc'het , bev ha splann , spered ar Gelted Kozh , hag int-i eo , peurgetket , a-gevret gant o c'henseurted okitan , "Trobadors ar Garantez gourtes " ( Fin Amor ) o deus miret o hêrezh .
( 16 )
Ne vo ket displeget aman istor ar menozioù o deus eilpennet ar gevredigezh henvoazel betek amzer gwall spontus an Dispac'h Bras ma vevomp hiziv c'hoazh an dilerc'hioù !
Luskad ar Romantelezh ha dudi ma veze diskouezet gant tud'zo evit an Istor ( Michelet ) , a lakaas da enorin en-dro , dindan ren Napoléon III , stourm ar C'halianed ha mare ar Grennamzer ( Kastelloù kozh bet adnevezet gant Viollet-Le-Duc , delwenn vras-divent Verkingetoriks savet e penn krec'h Alezia ... )
Awenet e oa bet "ar Vrezhonekadurezh Arnevez " ( Néobretonisme ) , bet degaset koun diganti en e levr gant Jean-Yves Guiomar , dindan skouer " Gorsedd " ( Kuzul ) an " Eisteddfod " broadel kembreat . ( 17 )
Met imboudet e veze ivez , d'an ampoent , war ur stroll menozioù boutin-tre evit ur rummad tud eus diwezh an naontekvet kantved , hini barzhoniezh kevrinel ar Geltiegezh bet liammet drezi an Drouiziezh ha Kredennoù bennak deut eus ar Reter ( Chamaned , prederouriezh Pitagoras , ... ) .
Hag e oa gwelet alies goude ar "Geltiegezh " mod nevez-se , deut ken diouzh ar c'hiz er c'henver-man , hini " Barzaz-Breiz " , hini Macpherson pe Hugo , evel un enklask romantel ha kevrinus-tre davit un tremened re varzhus ha mojennel . Ur seurt " Heroic Fantasy " a-ziagent , ma fell deoc'h .
Re gaer , neketa ? Mar gallfe bezan gwir ! ( 18 )
( Da Vezan Kendalc'het )
___
DAN AR WERN - Studioù - II - A-Drenv d'ar Ouel ... ( 2 ) - Here / Du 2005 ha 2020 - Breton Version / E Brezhoneg - Pep gwir miret strizh / All rights reserved / Tous droits réservés . "Studioù " , Copyright 2007 .
___
Notennoù :
13 - " An Drouiziezh " ( Le Druidisme ) , gant Jean Markale , Payot , 1985 .
14 - 24 a viz Mezheven 1717 , deiziad , evel ma oar pep hini , eus donedigezh ar Franmasonerezh war an Douar .
22 a viz Gwengolo 1717 , diazezadeg " Urzh an Drouizien " .
15 - Teodoz , Impalaer Roman Flavius Theodosius ( 347 - 395 ) .
16 - " The White Goddess " , gant Robert Graves , Faber and Faber , 1948 . 
17 - " Ar Vrezhonekadurezh " ( Le Bretonisme ) , gant Jean-Yves Guiomar , Archives Historiques de Bretagne /3 , Pennad niverenn 22 " Dalc'homp Sonj " ( Nevez Amzer 1988 ) , Kelaouenn istorel Vreizh .
18 - " Barzaz-Breiz " ( 1841 ha 1867 ) , gant Beskont Kervarker-Théodore de la Villemarqué ( 1815 - 1895 ) .
James MacPherson ( 1736 - 1796 ) , skrivagner skosat ,
oberour " Barzhonegoù Ossian "
( 1760 ) ha "Fingal " ( 1761 ) .
STUDIOU - II - SPECIAL HALLOWEEN - En Tu All d'Ar Ouel ... - Behind the Veil ... - Derrière le Voile ... Breton Version / E Brezhoneg ( 1 ) .
En Tu All d'Ar Ouel ... ( 1 )
da Léon Denis ( 1846 - 1927 )
" Deoc'h-c'hwi ,
A breudeur ha c'hoarezed ac'hanon en Denelezh ,
Deoc'h-c'hwi holl ,
Bet krommet ho korfoù gant samm ar vuhez ,
Bet mantret ho kalonoù gant stourmoù kriz ,
Nec'hamant ha trubuilhoù ,
' Vo gouestlet ar pajennoù-man ... "
Léon Denis
" O , deus , Ael ar Beure ,
Ha rog gant da Gleze
Pallenn teuc'h an noz ... "
Maodez Glanndour -
"Vijelez an Deiz Diwezhan " , III .
AL LIAMM , 1978 .
I - Spiritouriezh
" Ar Gelted kozh , hervez ar ouizieion , a skrive Maodez Glanndour en e levr , " Dre Inizi Ar Bed Keltiek " ( AL LIAMM , 1991 ) , ne lakaent ket speurennoù etre bed an diavaezoù ha bed o doueoù : an doueoù a veve en o zouez , hag int e-touez an doueoù . " ( 1 )
Kavout a reomp un hevelep mennozhioù e-barzh oberenn Léon Denis , " Le Génie Celtique et le Monde Invisible " ( Ijin ar Gelted hag ar Bed Diwel ) , bet adembannet nevez ' zo gant Embannadurioù PHILMAN , un ti-embann gouestlet d'ar Spiritouriezh . ( 2 )
Ha padal , ne gredemp ket e vefe bet ivez un hudsperedour an hini kentan , beleg katolik mod Breizh ha skrivagner brudet kentoc'h , prederour ha person ur barrez en e vro war un dro .
Met piv ' oa Léon Denis ?
Hervez a lavar Jean Prieur , un den eeun e oa , ur micherour lorenat , paour a-walc'h , hag a lenne diwezhat en noz da wellaat e zeskadurezh . ( 3 )
Allan Kardec ( 1804 - 1869 ) a gejas evit ar wech kentan e Tours , fromet-tre dirak ar Mestr , o selaou pizh e brezegenn er geoded-man . Pebezh diskuliadenn vras e oa bet evitan , hep mar ebet , d'en em lakaat da gomz ouzh hini en doa skrivet , e 1857 , "Levr ar Speredoù " , deuet buan ken brudet er
bed-holl goude-se ! ( 4 )
Anavezout a rae endeo berzh ar gwarellezh ( magnetism ) , a-raok Dispac'h Bras Bro-C'hall .
Franz-Anton Mesmer ( 1734 - 1815 ) , ur mezeg alaman en doa diskouezhet e nerzh hag amprouet anezhan dre implij ar "beruzennoù hollvedel "
( universal fluids ) .
Skoet en doa evel-se meur a galon e-kreiz ur mor a feizidi !
Ha kroget ivez gant un hent chomet kuzh .
A-hend-all , penaos kompren en em skignas ar Spiritouriezh 'vel ul luc'hedenn en naontekvet kantved ?
War a seblant , o doa desket tud "diouzh an dibab " , evel-just , da lakaat "an daolioù da drein " ( to do table-turning ) , rak o doa ezhomm mont e darempred gant o nesan aet d'an Anaon tost dezho evit komz ganto !
Ha tud anavezet , evel Victor Hugo , Conan Doyle , Eugénie de Montijo , deuet Impalaerez Bro-C'hall da c'houde , a oa dedennet gant studi-se "Kevrinoù an Ene " .
Napoléon III e-unan , he gwaz , en dije laret adalek an Nenvoù , dre hanterour ur Medium , "e vije bet diaes hiziv evidomp da gredin pegen pouezus , e pep kenver , e oa bet emglev ar Speredourien en naontekvet kantved , ken evit a sell ouzh ar brederouriezh , dre vras , ken evit ar vuhez voutin ivez . " ( 5 )
Hervez kont , e oa bet kroget an holl draoù-se e 1847 , pe 1848 , er Stadoù Unanet , pa glevas ar c'hoarezed Fox trouzioù iskis e-barzh o zi .( 6 )
Un doare kehentin etrevedel a zigore un hent nevez d'ur gredenn all . Pe gentoc'h , e oa ur mod all un tamm dishenvel hepken da dostaat ouzh an hini kozh a-gevret gant ar re varv , ha 'vel ma oa bet dija laret , en em skignas d'an tizh ruz war holl an Douar !
II - Dasorc'hidigezh
Hervez Relijion ar Gatoliked , omp salvet nemet gant Aberzh Meur Jezuz-Krist , e-pad Gwener Ar Groaz .
Met e kemenn deomp Sant-Paol ne vo dasorc'het nemet un Den speredel er C 'hloar gant un anien dishenvel dezhan goude e vuhez zouarel . ( 7 )
N'eus ket pell ' zo , abaoe un tregontad bennak a vloavezhioù ha marteze ouzhpenn , eo bet enrollet testenioù dedennus ha graet enklaskoù pizh diwar-benn "Buhez goude ar Marv " gant ur mezeg amerikan , Raymond Moody , hag hini deut ar brudetan evit se e-touez un nebeud klaskerien all a-vreman
Arnodennoù Nes d'ar Marv ( A.N.M ) - Near Death Experiments ( N.D.E ) . ( 8 )
" Ha kredin a ran mont en tu all ar gorre ? " , en em c'houlenne ivez hor barzh Jil Servat , gantan ar peurrest eus an Denelezh , ken prederiet gant he dazont . ( 9 )
Diouzh hon eus klevet , ez eus tu , hiziv an deiz , da enrollan mouezhioù re zispartiet , da filman anezho , zoken .
Ha e-barzh levrioù bennak seurt-se , tud yaouank marvet , kristenien pe nann , o deus gallet komz a-ziwar o buhez nevez er broioù astrel .
( 10 )
Ken kevrinus , evelato , e seblant bezan an tachennoù-se evit an darn vrasan ac'hanomp , spontet ma ' z omp , eveljust , gant ar pezh 'zo dianat deomp , ha re bell , war a gredomp , diouzh ma santomp en hor buhez bemdeziek : siwazh , n'eo ket c'hoazh un dra voutin pe zister da welout un Ael o tiskenn eus an Nenv !
Rak se , eo dav dimp bezan evezhiek-tre , pa lennomp testennoù a c'hellfe , ma vevfemp anezho , lakaat strafuilh da sevel en hor personelezh don , trubuilhan hor speredoù , pe vont re e-barzh hon diemskiant gant ur seurt bredelfennerezh dre ret o sklerijennan hon eneoù a-daol-trumm evel-se !
Kement a draoù ne ouzomp ket !
Ar c'hardinal Ratzinger e-unan , deuet da c'houde Benead XVI , a ziogele pemp bloaz ' zo , "e oa an den , er bed hiziv , en ezhomm eus an Dilavar , eus ur gevrin dreist-hiniennel evitan , eus ar Gened . "
Marteze n'en em gavomp met en diouer eus ul Lavar a-vreman , neuze ? Mouezh Doue , na mui na maez .
Hag ar pab da zont a ouzhpenne :
" N'eo nemet ha ma vefe evel ur mentad eus ar Beurbadelezh , e vefe bras ivez , hag e talvezfe kement-all hor buhez war an Douar . " ( 11 )
III - Adenkorfadur
Petra sonjal , neuze , a-zivout menoz , ken breutaet , an Adenkorfadur
( Reincarnation ) ?
War a seblant , e oa ur ger nevez d'ar c'houlz-se , bet ijinet a-ratozh-kaer gant Allan Kardec , da wirian e lezenn a "emdroadur war wellaat " evit an eneoù .
Hag hervezan , eo gwelloc'h ar ger-se eget hini a "dreuzvuhez "
( metempsychosis ) , bet graet gantan gant hon drouizien gozh .
Rak , diouzh Lezenn an hudsperedourien , ne c'hall ket ar Spered mont da zilignezan .
Diazezet eo o c'hredennoù , en enep , war Reizh ha Furnez Doue , E Youl da savetein E vugale , nebeut ha nebeut , gant Karantez , en ur rein dezho , evel-se , amzer a-walc'h da vont war well , dezho da zerc'hel mat , gant Spi , d'E Lavar .
" ... Genel , mervel , hag adc'henel c'hoazh , a gemenne Allan Kardec , mont war-raok hep ehan , evel-se eman Al Lezenn . " ( 12 )
Deomp-ni , e tegas da sonj eus ur rimadell vugale hag a c'hellfe arouezian "Rod Vras an Tonkadur " :
" Pep hini d'e dro , hag ar vilin a dro " , a gane Achantourez hon yaouankiz en he diskan . ( 13 )
Diouzh e du , setu pezh a seblante respont Dezhi Léon memes tra , hag en em stage ha kenglote pep tra gant ur poell strizh , hervezan , da heuliad buhezioù an eneoù ...
( Da Vezan Kendalc'het )
___
DAN AR WERN - Studioù - II - En Tu All d'ar Ouel ... ( 1 ) - Here / Du 2005 ha 2020 - Breton Version / E Brezhoneg - Pep gwir miret strizh / All rights reserved / Tous droits réservés . "Studioù " , Copyright 2007 .
___
Notennoù :
1 - "Dre Inizi ar Bed Keltiek " , Dremm ar Speredegezh Vrezhon , Gorre ha Donder , gant Maodez Glanndour , AL LIAMM , 1991 .
2 - "Ijin ar Gelted hag ar Bed Diwel " ( Le Génie Celtique et le Monde Invisible ) , gant Léon Denis , Philman , 2005 .
3 - "Europa ar Vediumned hag an Deskonidi " ( L'Europe des Médiums et des Initiés ) , gant Jean Prieur , Lanore , 1994 .
4 - "Levr ar Speredoù " ( Le Livre des Esprits ) , gant Allan Kardec , 1857 , Dervy-Livres , 1979 .
5 - "Allan Kardec en e Amzer " ( Allan Kardec et son Epoque ) , gant Jean Prieur , Emb. Du Rocher , 2004 .
6 - Ur roll pouezus o devoa dalc'het ar c'hoarezed Fox da zisklerian gwirvoud ar speredoù er Stadoù-Unanet .
7 - Sant-Paol , I , Kor - XV , 43 .
8 - "Buhez goude Ar Vuhez " ( Life after Life / La Vie après la Vie) , gant Raymond Moody , Robert Laffont , 1977 .
9 - "En Tu All d'ar Gorre " , kanaouenn Jil Servat , in "Le Pouvoir des Mots " , Kalondour , 1976 . Phonogram / Philips . Pep gwir miret strizh .
10 - "Lizheroù Pierre " ( Lettres de Pierre ) , gant Pierre Monnier , 7 levr , Lanore , 1980 - 1989 .
11 - " Prezegenn " ar C'hardinal Ratzinger , d'an 10 a viz Kerzu 2000 .
12 - " Kredo " an Hudsperedourien .
13 - " Mik , Mik , Mik " , kanaouenn hengounel Bro-Wened kanet gant Eliane Pronost , in "Chants du Vieux Monde " , laz-senin bleiniet gant Roje Abjean .
MOSAÏQUE - IV - Emsonjoù - Meditations - 1 - Esclarmonde .
Emsonjoù
( 1 )
Esclarmonde
" Monde , monde , vaste monde ,
Si tu t'appelais Raymonde ... " *
Un doare da sellet ouzh ar c'hlanded o vezan trelatet e spered gant dalc'h touellus ar gerioù . Met piv a gredfe bezan gouest da vestronian e sell , e lavar , pe e spered ?
( Une façon de voir la pureté , l'esprit bouleversé par l'emprise trompeuse des mots !
Mais qui se croirait capable de maîtriser son regard , sa parole ou son esprit ? )
J'ai rêvé que ton coeur Hunvreet m'eus e oa da galon
Etait pour moi le centre du monde , Kreiz ar bed evidon ,
Et je me suis dit Ha sonjet 'm boa ennon
Que c'était Esclarmonde E oa Esklarmond
Cherchant sa trace , O klask he roudoù
Au milieu des cieux ...
'Kreiz an nenvoù ...
* " Raymonde " , ur ganaouenn gant Maxime Le Forestier , emb. " Coïncidences " , in " Passer Ma Route " , Polydor , 1995 - Tous droits réservés / Pep gwir miret strizh .
___
Dan Ar Wern - MOSAÏQUE - IV - Emsonjoù - 1 - Esclarmonde - Castelfalfi , Toskana , 19 / 08 / 2007 - Pep gwir miret strizh / Tous droits réservés / All rights reserved .
" Emsonjoù " , Copyright 2007 / 2008 .
AUBERIVE ( Trede Kelc'h ) - 5 - Kernevez / Villeneuve , Breton Version / E Brezhoneg ( 2 ) .
Auberive ( 5 )
Kernevez ( dibenn )
3 - Diskennet omp en-dro .
Adkavet em boa va c'henseurted , buhez ar burev .
Ur chans 'oa dit m'he doa fiziet ennon he chomlec'h , a sonjen , ankeniet . Hag ivez , ma oa-hi o chom e rannvro Pariz , eveldon : " Au pair emaon , e Neuilly ... evit daou viz c'hoazh . "
Krenan a raen pa gleven ar c'homzoù-se , distaget ken sklaer , 'vel ur varnadenn .
Lizheroù karantez hir a skriven dezhi . Bep noz , e klasken pellgomz .
Bepred hegarat , habask , evel ma seblant bezan an Amerikaned , e c'hoarzhe-hi goap , difrom ha pragmatek , ouzh va c'hinnigoù .
Lakaet e voe un emgav .
Envorin a ran ... Kemer a ris anezhi dirak he skol-dans , plasenn an Invalides .
En e bleunv e oa Miz Ebrel . Ha me 'gave din e oa-hi boemusoc'h egt biskoazh .
Hep rannan ger ebet , e treuzjomp an Tuileries .
Kemennet ez poa din : " Klask klevet an diskan-man hepken : Buhez , me 'gar ac'hanout ! "
Ha me da sonjal , koulskoude , en ur poz-kan all a salmfe trist e respont ennon , e-touez bernioù deil gwenvet gant flourig ar marv , hini avel an diskar-amzer :
" Miz Ebrel , e teuio ... Miz Gwengolo , e teuio d'am c'houn . " ( 7 )
Leun-barr a levenez , e tennez da alan en aer sin : " Na pegen eürus on da vezan aman ... Pegen kaer eo an devezh ! "
An heol splann a sklerijenne da zaoulagad gwervaen , nemet e vefe da vousc'hoarzh a savfe davetan .
Biskoazh n'ankounac'hain an ti-debrin-se , war-zu Saint-Michel , lec'h ma oan bet degaset ganit : " An Ostaleri Vihan " 
Deut eo da vezan pal va firc'hirinadennoù .
" Plijout a-walc'h a ran dit ? Troc'het 'm eus va blev " , a lavaras din a vouezh izel , gant he neuz eeun a roe c'hoant din , muioc'h c'hoazh , da bokat dezhi evel ur foll !
Kinnig a ris dezhi he frof : arc'henadoù-koroll nevez he doa diskouezet din a-raok , entanet , e gwitrin ur stal-vras .
Dre laer , e stokas he dorn ouzh va brec'h .
" Trugarez , Yann , n'on ket dellezek anezho , ne rankjes ket bezan graet kement-se . "
Termal a reas un tammig , mezh ganti , ruzaj o tont war he divjod : " ... Re gaer int ... "
War-nes eilgerian e oan bet , ha me da grenan gant an drivliadenn-se :
" Grik ... Ne lavar seurt ... Chom didrouz ... Piv 'c'hell didouezian ar gaou diouzh ar wirionez ? " ( 8 )
Goude ur predig sioul : " Gout a rez , me 'zo gant ar sonj da vont kuit bremaik ... da Vro-C'hres em eus c'hoant da veajin gant Julia , va mignonez ... Anavezout mat a rez anezhi endeo , neketa ? "
An hini a oa a chome e Bro-Saoz . A-hend-all , ez aent bepred da skian o-div a-gevret .
Dinerzh , e respontis goustad , evel peurvantret dirak un dazont hepzi na oa tec'h ebet dioutan .
Hag an dra-se am boa raksantet , hep gaout ar galon da dalan outi .
Yen-skorn , marteze , e oa deut va mousfent eviti :
" Kredin a ran ez in d'en em veuzin er Saen " .
N'he doa ket kredet kompren , pe van he doa graet , kentoc'h , da c'hoarzhin : " Waah ! Pegen romantel oc'h-chwi bepred , Gallaoued ! "
4 - Ne oa ket bet tizhet barr an dic'hoanag c'hoazh .
Pa oan oc'h ambroug anezhi e-tal digor meurdezus ar palez-se ma oa o chom ennan , e santis un tamm nec'hamant pa ranken dilezel eno va frinsez yaouank , evel dirak dor , prennet da viken , an ezvezans .
Mennet e oa d'am c'halonekaat , hag hi da laret din e teufe en-dro e-pad un nebeud devezhioù .
Gerioù na c'hallent nemet degas muioc'h a anken war va spered .
Derc'hel a raen anezhi an tostan din , daeroù em daoulagad ...
" Mont tre a rankan , breman ... So long , Yann ! Take care ! "
Pell em eus gouelet , gouzanvet 'm eus .
Den ebet n'en deus merzet spisoc'h egedon e oamp ken dinerzh ha dic'halloud rak taolioù gidas an Tonkad .
Fellout a raje din da heulian betek penn ar Bed , dre ar morioù , war gein va marc'h-red , kozh ha feal .
M'em bije gellet ...
Karout a raen ac'hanout , Virjinia .
Evel dour difinv al lenn , entanet gant ur sterenn diamen ...
Va c'harantez e oas , va bann-heol din-me .
Mes , ro din ur respont : da ven e ranker mont pa'z eo bet tizhet penn an hunvre ? ( 1 )
___
DAN AR WERN - Auberive ( Trede kelc'h ) - 5 - Kernevez / Villeneuve ( 2 ) - Meurzh 1986 - Bet embannet war AL LIAMM 336 ( C'hwevrer 2003 ) - Breton Version / E Brezhoneg - Pep gwir miret strizh / All rights reserved / Tous droits reservés . " Auberive " , Copyright 2006 .
___
Notennoù :
1 - Kanaouenn Dan Fogelberg : " Nether Lands ", Hickory Grove Music ( ASCAP ) , 1977 . All rights reserved .
2 - " Virjinia " , 1979 , in " Auberive " 7 , barzhoneg Dan Ar Wern .
3 - " Who has seen the wind ?" , danevell Carson McCullers , skrivagnerez amerikat ( 1914 - 1967 ) , embannet e 1956 e-barzh ar gelaouenn " Mademoiselle " , and in " The Mortgaged Heart " , Houghton Mifflin , Boston , 1971 .
4 - " The Sojourner " ( An Tremeniad ) , danevell Carson Mc Cullers , embannet e " Mademoiselle " e 1950 , ha goude , e-barzh " The Ballad Of The Sad Cafe " ( Gwerz ar C'hafedi Trist ) , Houghton Mifflin (1951 ) .
5 - " Heinrich Von Ofterdingen " ( 1802 ) , romant lourennek , intret a varzhoniez hag a brederouriezh , brudet-kaer . Bet skrivet gant ar skrivagner german Novalis ( 1772 - 1801 ) , oberour meur ar Romantelezh .
Sophie Von Kühn , danvez-gwreg Novalis , a oa marvet yaouank-tre . Nec'het-bras e oa bet ar barzh gant ar gwalldaol-se .
6 - Kanaouenn all Dan Fogelberg : " There's a place in the world for a gambler ", in " Souvenirs " , Hickory Grove Music ( ASCAP ) , 1974 .
7 - " April come she will " , kanenn vrudet gant Simon and Garfunkel . Pattern Music LTD , 1965 , Paul Simon . All rights reserved .
8 - " Dancing Shoes " ( Botoù Dansal ) , ur ganenn all gant Dan Fogelberg , in " Nether Lands " .
___
" Ken kaer eo honnezh ma vezer skoet gant ar boan pa seller outi .
Re bar d'un ene hewel eo ... "
Isabelle Rivière , " Skeudoù Alain-Fournier " , An Istor Gaer . Emile-Paul Frères , 1947 .
___
AUBERIVE ( Trede Kelc'h ) - 5 - Kernevez / Villeneuve , Breton Version / E Brezhoneg ( 1 ) .
Auberive ( 5 )
Kernevez
Kinniget da Vefa de Bellaing
" Ha da belec'h ez it , pa'z eo tizhet penn hoc'h hunvre ? " ( 1 )
( Where do you go , when you get to the end of your dream ? )
Dan Fogelberg - " Nether Lands " - Hickory Grove Music , 1977 ( ASCAP )
All rights reserved .
1 - Pignat a ranker evit mont da Gernevez .
Kuitaet oc'h bet ar gêr vras dizanv , astennet ganti he brec'hioù en oabl damlouet , dindan ar glav ... Dilezet ivez Porzh-Houarn Lyon , pell zo , e voged , e rouestlad linennoù hent-houarn hag e zonkadurioù diniver .
Aman , ez eus tud pres warno . Redek a reont a bep tu , bount ha chav ganto , evel merien .
Hag evel ur freg e klemm divent an Denelezh , gant e lavar diveiz , e skrign ar rodoù war an houarn : du-hont , steuziet en engroez , evel lonket gantan , un dorn astennet en dic'hoanag war-zu unan bennak all , war dec'h , evel skeud ur minc'hoarzh war glask ur plac'h yaouank .
Houman , aet buan diwar wel , he deus diskouezet deoc'h , e-pad un herrad berr , hent ur vuhez adc'hanet ...
Klask a rit en em rein da gousket , gourvezet war ho fled , en desped d'an trouz , d'an tommder , d'an diaez m'eo bezan c'hwec'h den stardet kichen-ha-kichen , ha roc'hal a ra unan anezho , bern-war-vern , er c'hambod strizh-se .
C'hoarzhadennoù mouget , kuzhuligoù n'eus fin ebet dezho gant daou anezho , e-krec'h ...
Ha da gredin 'zo eman Laura ha Muriel o klask o kouvian , ha koulskoude , n'o anavezit ket , kas ac'hanoc'h en o c'hoari , ha rein hoc'h ali war o c'hudennoù diabarzh n'emaoc'h mui dic'houzvez anezho ken .
Da c'houde , eo bet trec'h an hun warnoc'h , en diwezh , hag horjellerezh gwaskus ar vagon a zo deut a-benn d'ho luskellan ...
Buanoc'h-buanan , e tremen skeudennoù diwezhan an devezh , a-feur ma tap an tren tizh , dre riboull divoull an hunvreoù diechu : distro d'ar burev poultrennek , damvelen e skleur ar goulou neon , gant e zremmoù blouc'h , daouarn bouk tud lorc'hus , fouge ha stad enno dalc'hmat .
Dihelloù kaset da benn , etre div gaozeadenn ne servijont da netra , nemet da lakaat biz an horolaj landreant da vont primoc'h ...
Klianted amjestr , pellgomzadennoù , promesaoù pilpous d'ur plac'h a vo disonjet buan , peogwir ne douell nemet hoc'h enoe ...
Hag evel-se e tibun ur vuhez , dizudi , diret a-grenn , dre ijin un ardivink diskiant ha diroll hepken , hini ur c'hargiad yaouank , e-unan-penn , hag a glask tec'hout diouzh ar pemdez unton : heman oc'h en em gav gludet e brizh boazioù e genseurted !
Ha setu erru ar pred-se , en diwezh , ar poent hirgortozet da vont kuit , da c'hwec'h eur rik , met araokaet un tamm hiziv , rak , abaoe an derc'hent , mezvet oc'h ha moustret eo ho kalon , skoulmet ho poull-kalon gant avel ar frankiz : c'hoant ho poa da zislonkan zoken , a-wechoù ...
Ur sigaretenn gant unan all c'hoazh , hag an amzer 'ra he zro .
Goude-se , evel dre laer , e tec'hit kuit !
Gweledegizhioù all a darzho bremaik , pelloc'h , diresisoc'h , pa vo morzet an noz , serret en he c'havell kevrinus : emaon war gein ur marc'h feuls , d'an daoulamm , a-hed gouelec'h divent al Lev-Traezh , e Plistin , e-tal mor dirollet va bugeliezh ha va yaouankiz . Pemzek vloaz e oan d'ar mare-se .
Adwelout a ran c'hoazh va c'harantez kentan , diamen , gant he fennad- blev hir , liv ar mel . Ruzian a rae he dremm , ha grik ne rannemp ...
Pallenn ar pavioù-bran , hag ar banal e bleunv , a skuilhe o frond war an tevinier uhel . Lakaet e veze bodoù an nevez-amzer , dizeliet gant an avel-vintin , war lien kriz ar mor-bras . Hag ez ae livioù anezho , ken tener , da goll e koumoul un oabl damruzlivet gant ar spi .
" Da belec'h eo aet an holl draoù-se 'ta ? " , emezon-me , a feur ma tizolo ar saprennoù ken bras ha du er goulou-deiz gwenn-holl , dindan an erc'h dinamm : ha gedourien int , war a seblant , e traon ar barroù meurdezus .
Netraigoù , marteze , ganet diwar arvestin neuz an traoù , evel ur c'hoant diwalc'h war nij en aer , hag a vefe mennet , a-wechoù , da enkrezin kalon un den yaouank o vont da gestal ur gwirvoud all , ur boud all enno .
Tra ken , a-dra-sur , met ur brizhhunvre dibad , hag a dresfe trolinennoù diresis ur Spes peurbadel , gant e donkadur dreistlavar ...
Komzoù steuziet kerkent ha bet klevet , a sonje din , hag a adkaver gant poan e kammdroiù un endervezh sioul , kent nijal kuit diwar muzelloù un Achantourez , ' trezek broioù kevrinus .
Netra all , panevet uloc'h e kontreoù ar rez , luc'hskeudennoù kozh ...
2 - Sellout a ran outo , bep an amzer , pa sav hiraezh ennon d'an deizioù tremenet .
Da zremm a gas ac'hanon c'hoazh davit ar momedoù-se a c'hras hag a gerse , war glask ur marevezh kollet .
Ne oa nemet ur sizhunvez-ehan , koulskoude , 'vel kalz reoù all , en ul lec'h m'eo kustum an dud mont da skian , en Alpoù .
En ti-prenn bras-se , avat , war ar menez , e rene un endro gouel , intret a joa hag a yaouankiz . Hep mar , en gortoz e oan-me d'un dra bennak burzhudus , un dra ne oamp ket evit ober zoken , " dreistdiraez " , evel ma ouzhpenni diwezhatoc'h , te , plac'h Sant-Loeiz * , war un ton pragmatek .
" C'hwi , Gallaoued , eo hunvreerien , evel Chateaubriand ... Ar Romantelezh am eus studiet ! " , ' poa lavaret din , stad ennout , en ur zistagan ur c'hoarzhadenn sev , ma kleved enni , neuze , son da vouezh ken dudius , " a-vaez-bro " .
Met , en tu-hont d'ar meizad mezegel-se , yen un tamm , dispriz ennan , e oa kuzhet , me 'zo sur , ha pa vefe bet diemskiant evidout , ar gourvenn da c'houzout hiroc'h diwar va fenn , da lakaat da voemerezh da c'hoari ganin-me , d'am waskan ...
" O , Virjinia , hag ez eo un disterig plas ez kalon evit ur garantez c'hloazet ? Is there a place in your heart for a wounded love ? ( 2 )
Diwar adlenn ar varzhoneg gozh-se , e klaskan faltazian war da vuhez a-vreman , ken estren hiviziken , trec'hin war gement a zo deut re ziseblant etrezomp , 'vel ar sioulded-se , kalz re spis , degaset din , hag en desped din , gant distruj didruez an amzer hepken .
E-pad pell em eus gouelet , gouzanvet ' m eus .
Den n'en deus garmet krenvoc'h eget an droug-se ennon , dihunet kriz diwar santad ar goullanter , 'vel ur sammad re bounner ha didrouz .
Penaos tapout krog er pezh na c'haller ket merzet ?
Penaos en em goll e froudennoù an avel , hag a hoal ac'hanoc'h , a dro hag a dec'h , a-daol-trumm , a-sil dre ar c'hoabrennoù ?
" Piv en deus gwelet an avel ? " ( 3 )
Ha dleet 'oa din mont da heul ar wennili , a-us plaenenn divent ar morioù , pe guzhat , rag-eeun , e-barzh ul lizher ?
Morse respont ebet n'em eus bet .
Ur wech hepken ' poa skrivet din evit va zrugarekaat war-bouez ur valizenn bet ankounac'haet ganit dre zievezh , hag adkaset ganin goude , an holl frejoù war va c'houst . Setu tout .
Ne oa lec'h ebet ennout evit an tremened .
Dazont ebet , kennebeut , goude hon devalennoù foll war roudennoù-ski Kernevez , hor c'haouadoù c'hoarzhin , hor c'hrogadoù fent en erc'h gant Padrig ha Bernez .
Nag hor c'hendivizoù entanet war oberennoù Carson McCullers , ha re Novalis , da belec'h int aet 'ta ?
" The Sojourner " on , an dremeniadez , emezout , e-ser c'hwezhan an tan , moarvat , ha gant ur pezh fouge ennout . ( 4 )
" Ha te , Heinrich out , paourkaezh ! Gouelan a rez c'hoazh , kollet eo da Sophie ganit ! " , ez poa lavaret din war ton ar godis hag an damant . ( 5 )
Diwar-benn va Breizh din-me edon o komz dit , a-zivout he yezh ankouaet hag he sevenadur disprizet .
" Tud iskis oc'h-c'hwi , Gallaoued ! Fentus eo , han ! Ne'm eus anavezet aman nemet un dispac'her euskarat ! Ha te , breman ! "
Nag an abardaez-se , er piano-bar ?
Da ganenn hud az poa kanet , hini Dan Fogelberg , hon hini : " There's a place in the world for a gambler " ( Bez'ez eus ul lec'h er bed evit ur c'hoarier ) ... ( 6 )
Ha danset hor boa war-lerc'h , re hor boa evet , irish-coffee , sangria ...
" Gout 'rez , Yann , ma fell dit bezan eurus , e rankez sonjal er c'houlzad resis-man hepken " .
Da zargreiz e oan o stardan , o lakaat va fenn war da blennad-blev hir alaouret .
Un dremm ael a floure va hini .
Neuze , hep lavaret grik , az poa poket din feuls !
( da vezan kendalc'het )
DAN AR WERN - Auberive ( Trede kelc'h ) - 5 - Kernevez / Villeneuve ( 1 ) - Breton Version / E Brezhoneg - Meurzh 1986 - Embannet war AL LIAMM 336 ( C'hwevrer 2003 ) - Pep gwir miret strizh / All rights reserved / Tous droits réservés . " Auberive " , Copyright 2006 .
Taolenn : " Studi " gant William Bouguereau ( 1898 ) - Droits réservés .
* Sant-Loeiz ( Missouri ) .
AUBERIVE ( Trede Kelc'h ) - 2 - Ar Gejadenn / La Rencontre / The Encounter , Breton Version / E Brezhoneg ( 2 ) .
Auberive ( 2 )
Ar Gejadenn
( dibenn )
Da gentan , ne gomprenen ket perak he doa skrivet d'ar c'helc'h " Ni Hon-Daou " .
War a seblante , e vefe bet aes dezhi kavout paotred a-zoare , speredek , dedennus .
N'hor boa ket kredet eskemman luc'hskeudennoù , met , a-viskoazh , em boa sonjet e oa-hi kaer-tre , re gaer , re goant zoken , evit un den didalvez , ur bureviad ken dister ha me .
" An dekenn , ar Pin-up ... hag ar bureviad " , tenergan arnevez , pennad kentan !
Respontet em boa d'he lizher , aon ganin evelkent na vefe bet graet goap ouzhin .
Ken dous e voe , en enep , en he respont , o tanevellan he digenvez kuzh , o kompren ken mat ac'hanon , hag o tiskouez bezan ken tost ouzh va hunvreoù glanan ! Dic'hortoz e oa !
Santout a rejomp diouzhtu e oamp graet evit bevan a-gevret , dorn-ouzh-dorn .
Siwazh , ken abaf e oan deut , m'em boa divizet , mui pe vui , livan un tammig va doareoù ha va buhez !
Ha setu me troet e beajour-kenwerzh , o vont hag o tont e pevar c'horn ar bed , o redek broioù ha morioù da zivizout a-ziwar aferioù pouezus : re o tennan d'an urzhiataerezhioù , d'ar bankerezh , hag all ...
Anat e oa deut , a-benn ar fin , hor c'hudenn vras : kavout amzer vak evit kejan hon-daou !
Erru e oa ar merc'her , en diwezh , gant e samm a enkrez , gwell eo din laret .
Rak aon am boa muioc'h-mui , a-feur ma tremene an eurvezhioù .
A-daol-trumm e tintas an horolaj , koun mat am eus : kreisteiz !
D'an daoulamm , pe d'ar pevarlamm ruz , n'ouzon ket breman , ez eas va c'halon em c'hreiz , evel ur marc'h diroll , ha va sonjoù a zeredas em fenn , henvel ouzh ur menez-tan , gant tizh o nerzh !
Poent e oa mont !
Adwelout a ris , ur wech c'hoazh , film c'hwitet va buhez , p'edon o kerzhout dindan ar glav o litennin ken unton ha ken ingal eus an oabl , pe eus tu all ar bez , marteze ...
N'eo ket pell an hent , dre riboulioù ar " metro " .
Hiroc'h a-walc'h , evelkent , dre m'em boa ezhomm da vont war va zreid , da stranin un tamm gant va sonjoù , horjellet gant an engroez , da chaokat ennon mil preder touellus a waskerezh , mesket gant ur c'hoant didruez a zroukrans a vefe un digoll din .
A-hed ar ruioù kinklet-kaer evit Nedeleg , evel e kildroennoù ur ster liesliv , sklerijennet-holl ha beuzet krenn en endro ar gouelioù , e tibune a-viliadoù bugale kozh deut d'o ment , o klask ur c'hoariell nevez bennak , pe oc'h hunvreal er freskijenn .
Edo pep hini o redek davet unan all evit un tremen hepken , tu pe du , tudennoù dihenchet o kerzhout hep pal , evel skeudoù digenvez o vont da gerc'hat o zonkadur , pe o klask ur ster d'ur pezh-c'hoari kevrinus na gomprenint ket , o tiduin didruez hag o vervel goustadik e trouzioù an didrouz .
The Sounds Of Silence ( 3 ) .
Ya , tec'hout , ha degas ganeomp nemet hor pokoù : " Si , fuggire , e portarci solo i nostri baci ... "
Ar pezh a gan sarac'h delioù ar gwez war ar vali : finval a reont dindan an avel-walarn , evel va mouezh a zeufe enno d'az kervel , a-dreuz gweledvaoù da vugaleaj e-kichen Roma .
Ha va daouarn a flour c'hwek da vlev du , oc'h en em goll enno ...
Pell on bet ouzh da c'hortoz , Laura . Ken pell ...
Met a-us d'an dourioù tenval , en em welout a ran o tremen war Bont an Arzoù .
Bremaik e vo te , dirak an nor-dal , bremaik e vi gwelet gant ur vrozh wenn hag ur vantell zu , livioù Breizh , da c'houzoug gwarezet gant ur skerbenn ruz , evel goanag feuls un nevez-amzer adc'hanet !
Bremaik ...
Tridan ' ra va c'halon , ur c'hlizienn enni , evel an douar o krenan , oc'h entanan hag o tarzhan evel an Etna pe ar Stromboli ...
Kridiennoù am eus , kreniennoù terzhienn .
Laura... Ar Palez Bras ...
Deuet on en-dro d'am burev .
Kerzhet em eus kalz dindan ar glav . Sec'hed am boa , sec'hed bras ...
E-pad eurvezhioù , em eus sellet pizh ouzh ar riblennoù-straed , soublet va fenn , o vont hep gouzout pelec'h , aman hag ahont , hep kompren ...
Evel ur foll pe un den gouez , em boa dirollet da zifronkan , da c'hoarzhin .
Piv an diaoul en doa graet an taol-se ?
Petra 'oa c'hoarvezet gant va gwreg ? Piv en doa laret dezhi ?
Perak e oa-hi o tougen dilhadoù gwenn ha du evel re Laura , gant ur skerbenn ruz-flamm ?
Seblantout a rae gortoz unan bennak , en he sav war an diri , o vutunin nervus , oc'h ober neuz da sellout ouzh liketennoù ar mirdi , dindan an disglavier am boa profet dezhi , pell a oa , e Venezia .
Piv an diaoul ?...
___
DAN AR WERN - Auberive ( Kelc'h Tri ) - 2 - Ar Gejadenn ( 2 ) - Kerzu 1984 - Breton Version / E Brezhoneg - Bet embannet war AL LIAMM 234 ( Genver / C'hwevrer 1986 ) - Pep gwir miret strizh / Tous droits réservés / All rights reserved . " Auberive " , copyright 2006 .
___
Notennoù
1 - Tro-lavar Bro-Dreger .
2 - William-Adolphe Bouguereau ( 1825 - 1905 ) , liviour gall eus La Rochelle . "Temptadur " ( Tentation ) , 1880 .
3 - " The Sound Of Silence " , kanaouenn vrudet an daouad amerikan , Simon and Garfunkel .
Copyright 1965 , Paul Simon . Pattern Music , LTD . Sony Music . All rights reserved .
MEIN DIWAR VA HENT - VIII - La Tour de Pise - Tour Pisa - The Tower Of Pisa .
La Tour de Pise
" Den Turm besteigend
Sah ich die Welt
Der Nacht sich neigend ... "
René Schickele - Poésies / Gedichte -
" Sonnenuntergang / Crépuscule " *
A toi qui ne m'as pas
Regardé ,
Je voudrais dire
Je t'aime ,
Le sais-tu ?
Reçois ces quelques fleurs ,
Brise légère ,
Esquisses d'un poème ,
Bises du vent d'été ,
Caresses de coeur brisé ...
Je suis venu , mon amour ,
Chercher le mystère caché ...
As-tu vu ,
A l'ombre d'un reflet de pierre ,
Comme parfums d'église ,
Nos regrets ?...
Si l'on redressait un jour ,
La Tour de Pise ,
Dieu sait comment
Je t'aimerais ...
DAN AR WERN - Mein Diwar Va Hent - 8 - La Tour de Pise - 22 Août , Castelfalfi
( Toscane ) et 10 Octobre 2007 - Pep gwir miret strizh - Tous droits réservés - All rights reserved . " Mein Diwar Va Hent " , Copyright 2006 .
Tableau : " Nostalgie de l'Infini " ( 1913 ) , par Giorgio de Chirico ( 1888 - 1978 )
* " Escaladant la Tour ,
Je vis le Monde
S'incliner vers la nuit ... "
AUBERIVE ( Trede Kelc'h ) - 2 - Ar Gejadenn / La Rencontre / The Encounter , Breton Version / E Brezhoneg ( 1 ) .
AUBERIVE ( 2 )
Ar Gejadenn
da C ... ( va gwreg gentan , italianez-aostrianez a orin )
" Piv oc'h ? Petra a rit aman ?
N'ho anavezan ket .
Ha koulskoude , a gav din , ho anavezout a ran . "
Alain-Fournier ( 1886 - 1914 ) .
Diwar-benn Melizand , e-barzh " Meaulnes Veur "
N'eo ket aes , er beure-man , steudan sifroù .
Setu pell'zo , milvedoù , e kavan ar vuhez-se enoeüs hag hir ...
Bepred ar memes tud en ur burev ken sioul hag ur bez .
Pennkonter on , pebezh gloar !
Pa sonjan ...
Hiziv , ne c'hellan ket tapout krog em sonjoù , pe gentoc'h derc'hel anezho , zoken .
C'hoant o deus , sur a-walc'h evidon , da vont da gantren war an toennoù lous ha gleborek , d'en em silan dre ar gwerennoù divoull evit distanan dindan skleurennoù glas un heol goanv o c'hoari toull-kuzh gant skeud ar c'houmoul du o vont e pilhoù .
N'on ket deuet mat aman , dre ma'z on ur rener , da lavarout eo unan bennak etre ar Pennrener hag an implijidi .
Ha den ebet ne blij dezhan ar beli , zoken kuzhet a-drek minc'hoarzhoù damantus , evel ma oar ober pep hini dre-man , ha me evel ar re all .
Gortoz a ran , e damc'houlou an deiz war e ziskar , ne vern petra resis hag a vefe lec'hiet e penn all ar sal-man , ken strizh , dres a-us da zremm vrav ha dilavar va amezegez .
An hini eo hounnezh , o stouin , kehelus , damdeoget , war vern divent he faperachoù diene .
Hag e ra van an holl-se da ziskouez diavaezioù ken sirius , pe ken tenval ?
En em c'houlenn a ran , a-wechoù ...
Eveldon ... Gant va gwreg ha n' he deus netra muioc'h d'am larout eget ar skinwel , ha va bugale , ezvezant ken alies , gwelet ur wech an amzer e dibenn an devezh , o tont en-dro d'ar gêr , pell re ziwezhat d'am meno , o tegas ganto en o c'hambr yaouankizoù estranch , difarle , " teen-agers " a-vec'h merzet , nepred adwelet goude ...
Hag ar re-se aman , paour-keizh !
Nasket int gant o boazioù pemdeziek ha nac'hidigezh o bezans wirion .
Dilezet o deus o boud , da viken marteze , d'e guzhat n'ouzon ket e peseurt bed kevrinus , diwel .
Ardivinkoù hepken int deut da vezan , sentus ha goullo , a labour a-dal din , hag a-zoare , evel just !
Euzhusat hurlink !
Penaos kuitaat anezho ? Penaos tec'hout ac'han , hag en em zieubin ?
A dra sur , a-hend-all , e sono kreisteiz bremaik , gant an horolaj a-ispilh ouzh ar voger damvelen , hag e dik-tak dic'houzanvus .
Naon bras am eus !
Kenderc'hel a ran da skrivan , koulskoude : ret eo bepred ober neuz ...
Naon du ma vo chenchet an traoù .
" Heman 'zo 'vel kezeg Benac'h : ne c'houlenn ken met boued ha beaj ! , a lare mamm-gozh en ur c'hoarzhin .
Yaouank e oan d'ar mare-se , amzer va dimezin , yaouank-flamm , ha leun ag emdouelloù .
... Hegredik evel Inosant Ar Joli , " pa n'en doa bet tamm ebet d'e goan " , pezh a zo un dro-lavar em bro-me ( 1 ) .
Ha breman ... Ne ran nemet gortoz ...
Hag e teuio ar Merc'her , evel pep sizhun .
Mall am bo c'hoazh , ur wech ouzhpenn , da gaout ul lizher glas , skriverezet atav , e pakad al lizhiri ofisiel diniverus , gant ur merk ispisiel warnan ...
Met en deiz-se , ne vo ket anezhan !
Hiziv , da greizteiz hanter , e kejin , evit ar wech kentan , gant Laura , dirak ar Palez Bras .
Emgav 'zo ganeomp hon-daou , hag e welin , a-gevret ganti , diskouezadeg William Bouguereau : un daolenn a blij dezhi muioc'h eget ar re all , he doa laret din , anvet " An Temptadur " ( 2 ) .
Biskoazh n'em boa klevet tra diwar-benn al livour-se , ret eo din anzav . N'anavezen ket e anv zoken . Pell diouzh an arz e vevan , re bell eus ar Gened , a zo saveteerez nemeti hor menozioù disteran .
Gant Laura , e vo dishenvel , sur .
Ur vaouez vuhezek eo !
Muioc'h ouzhin e vo , mui pe vui .
Labourat a ra evit ur gelaouenn vrudet , ha dav eo dezhi mont e pep lec'h evit skrivan he fennadoù-skrid ken dudius .
Gouzout a oar kalz traoù diwar-benn ar sevenadur , dre vras , kalz muioc'h egedon .
War a seblant , dre lenn he lizheroù , anavezout a ra ur bern tud a bouez e Pariz , c'hoarerien , politikerien , hag all ... N'ouzon ket c'hoazh !
Ar c'hoant-se da vont war-raok , neketa , a vroudfe n'eus forzh pe galon wak , deut yen ha kalet evel an dir , hag a dommfe anezhi tamm ha tamm .
Evel ma voe degouezhet d'am hini , daoust din da vezan lezirek un tamm ivez .
Se , avat , ne lavaran ket !
( da vezan kendalc'het )
DAN AR WERN - Auberive ( Trede kelc'h ) - 2 - Ar Gejadenn / La Rencontre / The Encounter ( 1 ) - Kerzu 1984 - Embannet war AL LIAMM 234 ( Genver / C'hwevrer 1986 ) - Breton Version / E Brezhoneg - Pep gwir miret strizh / Tous droits réservés / All rights reserved . " Auberive " , Copyright 2006 .
