AMAN HAG AHONT - XV - An Egiptadez - L'Egyptienne - The Egyptian Girl ( E Brezhoneg / Breton Version ) .

11 Septembre 2012 , Rédigé par Dan Ar Wern Publié dans #Aman Hag Ahont

An Egiptadez

Egyptian Beauty 1 Esprit d'Osiris

Pennad Pemzek

11 a viz Gwengolo 2012

" Aet out kuit , Oziriz , kent distrein en-dro ,

Morennet a gouezjout da vezan dihunet ,

Mervel a rejout da vevan a-nevez ! "

Skrid ar Piramidoù - 1004 , Saqqarah .

Diaes eo displegan deoc'h perak 'oan bet dilezet d'am pemp bloaz kent din bezan degemeret goude e ti un tiegezh breizhat .

Diaes 'walc'h da larout deoc'h war un dro perak 'oan bet anvet Anna .

Gouzout a rit , mar bez gell va c'hroc'hen , eo aet gell ivez va ene gant ar glac'har !

Bewech ma 'z aen da Sant-Albin e vezen skoet gant ur boan iskis , ha p'edon o vale e Kastell Naoned e kreden klevout mouezhioù : ( 1 )

- Gallout a raimp herzel hir amzer ouzh an alouberien , va zad ?

- Bezit dizaon , va merc'h ! Repu a gavimp 'michans 'kreiz ar vro , 'touez hon Breizhiz kaezh ! Den na tra ebet ne harzo ouzh an erminig , c'hwi 'oar ! Ha goude-se emaon o c'hortoz sikour digant Masimilian Aostria . ( 2 )

Bremaik e teuio dimp da rein e skoaz . Bezit fizians ennomp !

Neuze ' vije gwell din mont da bourmen er vro , ken hanval ouzh ar re gozh eo anvioù va harlu nevez , d'am sonj : Karnak , Amon ...

Goude holl , ' oa bet gounezet Egipt ivez gant tud a-ziavaez-bro !

Hag evit a sell ouzh he yezh , e ouie hon hendadoù he c'homz gant galloud Iziz da zigejan he c'hevrinoù ... ( 3 )

He gelver a ran a-wechoù pa yud avel ar mizioù du 'us bezioù ar vered .

Plavan a ra 'vel ur skrev war ar c'hoummoù , o tont goude-se diwar nij !

Piv a glevo poan ar mor-bras , hag hi o krial ?

Ur skeud eo 'veldon-me a gantre war al lann , pa vez heol ruz Oziriz o veuzin en dremmwel , siwazh , 'raok mont da sevel a-nevez da vev 'trezomp !

Beajourezed kollet er vorenn emaomp .

Piv hon adkavo ?

____

DAN AR WERN - Aman hag Ahont - XV - An Egiptadez - Eost / Gwengolo 2012 - Pep gwir miret strizh - All rights reserved - Tous droits réservés - E Brezhoneg / Breton Version . " Aman hag Ahont " , copyright 2006 .

____

Notennoù :

1 - Sant-Albin-an-Hiliber , lec'h emgann ma voe trec'het ar Vretoned gant arme Bro-C'hall e 1488 ha kollet ganto o frankiz .

Kastell Naoned : Palez hon Duged Vreizh .

2 - Kendiviz faltaziek etre Anna Vreizh ( 1477 - 1514 ) hag he zad Fransez II ( 1435 - 1488 ) diwar-benn Masimilian 1an Habsburg ( 1459 -1519 ) , Impalaer Roman Santel , hag a voe sonjet he dimezin gantan 'vit derc'hel penn ouzh Roue Bro-C'hall .

3 - Mojenn Iziz ( pe Isis ) hag Oziriz : Seth , breur gevell Oziriz , en doa c'hoant da vezan roue en e lec'h . Setu perak e lazhas anezhan ha dispennas e gorf e 14 tamm . Gant sikour he c'hoar Neftis , e teuas a -benn Iziz d'adkavout holl an tammoù .