MOSAÏQUE - I - PENTATEUC'H / AMAN HAG AHONT - 3 - Modi & Jeanne .

14 Août 2006 , Rédigé par Dan Ar Wern Publié dans #MOSAÏQUE I

Modi & Jeanne

Pennad Tri
               14 a viz eost 2006

" Digor va daoulagad , evit ma welin burzhudoù Da Lezenn ! "

Psalmennoù - 118 , 18 ( Ghimel ) .

Diaes eo taolennin c'hoazh dre sonj ar vuhez diroll a rene tud'zo , tro ar bloavezhioù ugent , e Montparnasse !

Rak ur seurt " Azginivelezh " e oa aman goude " Ar Prantad Kaer " ( 8 ) hag ar Brezel Bras .

Arzourien ar bed-holl a zeue da Bariz da ziskulian , dishual ha digabestr war a gredent , o vevan e-doare an termaji o mennozhioù penn-araok hag o c'harantez entan evit an Arz .

Gwelout a reomp , da skouer , e-barzh ar film , m'en em dreuzwiskas Max Jacob ( 9 ) en ur " geisha " da-genver abardaez-lid e zeiz-ha-bloaz .

Istor Jeanne ( 10 ) eo , dreist-holl , hini he c'harantez foll , betek ar marv , gant " Modi " ( 11 ) , istor ar maouezed ivez , e veze mennet da livan imbroud ar c'hrouer o bravder usvedoniel-dispar , goulaouet gant sklerijennoù ar Geoded Vras ha re ar bredelfennerezh nevez-flamm !

A-wechoù , e tanse al livour en-dro da zelwenn Balzac , hag e krede an dremenidi gwelout un den diskiant pe zireizh : " Troet eo spered heman ! " , a sonje anezho a-dra-sur diwar e benn hag a glaske an tu d'e zro da c'hoarzhin goap , en un doare digoll , ouzh mirourien ha bourc'hizien a bep seurt na blije ket dezhan !

Marteze 'giz ur Marco Polo nevez e-kreiz ar c'harter Breton , e krede start ivez bezan ur reder-mor war hent kontreoù dianavez ?

" Henvel ouzh an awen eo c'hwezh klouar an avel hag a c'hello foenvin dindan barradoù gwallamzer " ! , eme an Italianad .

Divizet en doa mont da weladennin Doue ( Renoir evitan ) !

Nemet un den klanv e oa deut da vezan hini , koulskoude , ha bezan kollet gantan e zaouarn mailh , a-gevret gant emdouelloù e yaouankiz , a gomze outan eus " an devenn euzhus ma vez kavet warni , deiz pe zeiz , an holl arzourien , evit mont a-lamm-plom , da c'houde , davet o zonkadur " !

" Un den yaouank foll emaoc'h ? " , a c'houlennas dichek dezhan neoazh .

" Pa anavezin hoc'h ene , e livin o selloù " , a respontas " Modi " dezhan neuze .

Evel-se ivez en doa diskleriet e garantez da Jeanne , aelez gwirion ma oa o sonjal , dre heulian anezhan betek penn e zispi , e oa gwelloc'h d'he meno en em deurel dre ar prenestr er goullo kentoc'h chom bev pelloc'h goude marv an den meur !

( Da Vezan Kendalc'het )

___

Notennoù :
8 - La Belle Epoque .

9 - Max Jacob ( 1876 , e Kemper - 1944 , e Drancy ) , barzh breton .

10 - Jeanne Hébuterne ( 1898 - 1920 ) , livourez gall , gwreg " Modi ".

11 - Amedeo Modigliani ( 1884 - 1920 ) , livour ha kizeller italianat .

___

Levr : " Modigliani " , gant Christian Parisot , emb. Gallimard , 2005 .

Mirdi Montparnasse , 21 , bali Maine - 75015 - Pariz .

___

DAN AR WERN - MOSAÏQUE - I - PENTATEUC'H / Aman Hag Ahont - 3 - Modi & Jeanne - 14 a viz eost 2006 - Pep gwir miret strizh / Tous droits réservés / All rights reserved . " Aman Hag Ahont " , Copyright 2006 .

A-zivout " MODIGLIANI " , ur film kenwerc'het gant Mick Davis e 2004 . Dremmourien : Andy Garcia - Elsa Zylberstein - Hippolyte Girardot - Eva Herzigova - Omid Djalili . Sonerezh-orin gant Guy Farley - Studios Bauer-Martinez Copyright / Tous droits reservés .

___

Taolenn : " Jeanne Hébuterne " , gant Modigliani , 1919 .