AUBERIVE ( Trede Kelc'h ) - 13 - Dorioù ar Mor-Bras - La Porte Océane - The Ocean Doorway ( 20 ) - Breton Version / E Brezhoneg .

3 Février 2017 , Rédigé par Dan Ar Wern Publié dans #Trilogie 3 " Auberive " - Danevelloù

AUBERIVE ( 13 )

Dorioù ar Mor-Bras ( 20 )

( Heuliad "Istor ur Bleinier Laz-Senin " )

" Va Doue , va Aotrou Doue ,

Perak ez eo ret Deoc'h keit-se ,

'Vit ma c'hallfen o karout ker ,

Foeltran bleunioù va nev'zamzer ? "

Francis Jammes - "Frankizennoù en Nenv "

- An Iliz Gwisket gant Delioù ( 17 ) .

Pevare Lodenn : E Penn ar Veaj

Da Enorin Lhasa de Sela ( 1972 - 2010 )

" I got caught in a storm and carried away ... " *

Trede Devezh

" Petra ' c'houzanv ar marv , nemet pezh a from ha rann ac'hanomp ? "

Thomas Mann - "Tristan " ( 1903 )

20 - Hanternoz tremen e oa .

Ouzh tor an dorgenn a-bezh e savas tamm-ha-tamm ur safar boud o vont war gresk .

Kerzhadeg ur strollad tud oc'h en em waskan mell-divell an eil egile ' oa , engroez divent trouz gantan o c'holein daskren diheverz tonnoù ar mor en noz .

Tud o fennoù tokarnet ' zispake torchadoù ha goulaouennoù-tan a bare o flamm war o binvioù marvel , hag o tougen ur groaz du war o bruchedoù e kane meuleudi d'o C'hrouer gwadek !

- Krenit , c'hwi , tud disakret , mibien Satan !

Ra vo milliget an disivouderien !

Brouez an Aotrou ' bilo anezho holl ! , a yude gourdrouzus outo .

" Peseurt Doue eo Heman ? , a laoskas a vouezh izel ar Brinsez Aleksandra 'vit rein ur respont dezho .

Hag e sellae pizh ouzh an donvor , o huanadin mantret war kement-se .

Beuzet ' oa breman ar gouloù en ur vougenn flammus a zegase d'he c'houn lazhadeg pirc'hirined ar Menez Santel ( 22 ) .

- N'eur deuet a-benn nemet E c'houwelout en E gaeran gant eost an eneoù bet advevet Gantan a ziwano eus an Douar-man 'vel eus ur parkad gwinizh divent , pep penn-ed anezhan o vont da vezan ur sterenn un deiz ...

Nimmer müsse ich ersterben ...

( 23 )

Siwazh ne voe ket 'vit komz pelloc'h .

Mennet ' oa Fred da sikour Marieke .

O vezan dall , n'he doa ket intentet houman ' oa bet troc'het gouzoug he mamm !

Kroget he doa da vouskanan ur c'hantik karantez .

N'en doe nemet re nebeut a amzer , mac'het warnan gant ur yoc'h tud gourdrouzus , 'vit damwelout splannder dibar he dremm bet treuzneuziet gant un doare joa gevrinel .

- Erru omp ! , a hopas laouen gant ur gred birvidik diveizus .

Tre da laez gant e neuz fall ken mezevellus a Varn Ziwezhan , edo un ti-kozh o taean anezhan dirak ar goullo serzh : gwintet war an devenn 'vel ur spes gouez skeud-diskeud , e seblante respont dezhan , gotek e zoare , meurdezus e dal ginklet a-leizh gant kimeraed ha gargolioù-maen moliac'hus .

Uhel dreist ar mor divent , ' oa kelc'hiet gant sapr du bras ' veze oc'h ober gward warnan ha rein gwarez dezhan gant moger krenv o c'hefioù stank .

Maner Auberive ' oa marteze .

Peurlonket gant mor an dud e steuzias ar paourkaezh plac'h .

Den ebet ne glevas ken he gerioù diwezhan .

Flamm ur sterenn-dared a entanas an oabl ...

ECHU

( Heuliet gant "Laura " )

___

DAN AR WERN - Auberive ( Trede Kelc'h ) - 13 - Dorioù ar Mor-Bras - 20 - 2008 / 2010 - C'hwevrer 2017 - Pep gwir miret strizh - All rights reserved - Tous droits réservés - Breton Version / E Brezhoneg . "Auberive " , copyright 2006 .

___

Notennoù :

22 - Montsegur " ma voe losket en un tantad bras-divent e-harz ar menez 210 disivouder d'an 16 a viz Meurzh 1244 " ( diouzh Fernand Niel , "Albiziz ha Katared " , Albigeois et Cathares , 1955 ) .

23 - "Biken ne zlefen mervel ... "

Kanaouenn : * "Rising " gant Lhasa de Sela ( 1972 - 2010 ) en he "Lhasa " albom , copyright Les Disques Audiogrammes Inc ./ Warner Music 2009 .

Partager cet article