AN ERBEDER ( Kelc'h Kentan ) - VIII - Brezel ar Groaz - 11 - An Aotrou Brekilien ( 8 / 9 ) .

22 Décembre 2019 , Rédigé par Dan Ar Wern Publié dans #An Erbeder - Le Passeur Des Mondes

Kelc'h Kentan : Da Darzh an Deiz ...

An Erbeder ( VIII )

Trede Lodenn

/ Brezel Ar Groaz /

" Un Arouez kevrinus ' zo er Maen ,

Engravet don 'n E wad tanflamm ... "

Novalis - " Heinrich Von Ofterdingen "

- Ar Skarbouklen .

- Brezel ar Groaz -

11 - An Aotrou Brekilien ( 8 / 9 )

( Lizher Roll / Dornskrid ar Mestr )

" Palefarzhet an aour d'an unanvet ha pevarvet , e hoc'h-gouez spontet en sabel ; adpalefarzhet en arc'hant d'an eilvet ha trivet gant daou dour amzerioù aour kranellet gant pevar pezh en gul ha leinet gant peder vrizhenn en erminoù . "

Ardamezioù Brekilien

" Ar c'hwileien-raden n'o deus ket a roue hag ez eont er-maez holl dre vandennoù . "

Krennlavarioù , 30 , 27 - ( Ger ar Roue Salomon ) .

Istor Riou Lohieg

II - An Ergerzhadeg

8 - Mil Darvoud hag Unan

" Ne zisplegin ket dit dre ar munud ar mil darvoud hag unan eus an ergerzhadeg-se , a badas tost da dri bloavezh .

Padal , ret eo bet din ober evidout un danevell eus he degouezhioù heverkan .

A-hend-all , o deus laret da c'houde istorourien e oa gwir anezho , ha ' vel kalz ac'hanomp bet marc'heien ar C'hrist Jezuz , e oan bet test eus ar c'hentan gant va daoulagad a gement-se , gwir pe gaou da'z sonj ! "

9 - Loar Ruz ha Kroazioù Du

" ... En amzer-se emvod ar varoned , un tammig goude Sened-Meur Arvern hon broudas d'ober ar Brezel Santel , e hanvalas ur ouel leun-wad c'holein al Loar e kreizig kreiz ur fallaenn .

An arvest ken boemus-se a hirbadas betek penn an noz !

Kerkent ha gouloù-deiz avat , e-doug ma veze kuzhet ouzh hon daoulagad sebezet gant ur pikol a saotroù gwad , e stagas an astr da lugernin gant ul luc'h dianav .

Evel-se eo ma welljomp an dremmwel o vezan bet entanet ingal e-pad sizhunvezhioù bennak hon pourchasoù . Krog an aon enno o sonjal e tostae an enebourien , ez ae an dud er-maez eus o ziez pell diouzh ar gêr .

Ur marzh-se ken dispar a grenvaas hegredoni ar boblans , o tiskouez dezhi anat youl an Nenv hag o kreskin bevder kalonoù ar re glouaran war-un-dro !

Ne voe tra ebet da herzel ouzh mall bras ar Groazidi gentan a veze neuz warno ivez da boulzan 'vel bronsoù kentan an nevezamzer !

" En un douez iskis tud a zere liesseurt , peorien ha pinvidien , kozhidi ha bugale wisket n'eus forzh penaos a gemeras penn o hent : served gant tud a renk uhel , mistri o heulian o servijourien 'vit ur gwel , ar re-hont en o gourvez war leterioù stlejet gant oc'hen o c'harnioù houarnet , ar re-man o vont war droad ...

Ha goude bout bet atizet gant embannoù penngadourien vrezelgar , ' oa gouest pep hini anezho da glevout sarmonioù all a zisplege dezho prezegourien strizh ha pinijennus , leun a garantez Doue , bet awenet muioc'h gant an Avieloù a-dra-sur !

Ha re ivez , dishenvel a-walc'h , ar strinkelled-se , plac'hed skanv o fenn ha rederezed , a roe plijadur hepken da c'hounit arc'hant !

" Neoazh , ' oa deut dimp a benn da sevel hon teltoù ' kichenn kêrbenn Galia .

Ur sizhunvezhioù bennak a badas ma oa tu dimp ober hon mad o fringal hag o chaseal .

Padal , en o seiz plijadur warn-ugent ' veze beuzet an holl dud o c'hourc'hemenn hon disparti nevez gant youadegoù niverus , rak , pa ' oa gwelet ganto skampan bandedannoù divent ac'hanomp a c'helc'hie o c'hêr vras Lyon ' benn ar fin , e seblantas ivez dezho , war a gredan , bet disammet o spered !

" An Aotroùnez ar brasan a zigoras hent dirazomp :

- Hugues Vermandois da gentan , breur Fulup Ian roue Bro-C'hall , heman bet tonket da vervel , ha daoust dezhan bet douget da stourm ha da zerc'hel penn , ' raok m'en doe tro da gerzhout war an Douar Diouganet !

- Steven Bleaz , kont Bleaz ha Chartrez , ma veze prizet e binvidigezh gant niver bras e gastilli , homan 'vel deizioù ar bloaz hervez ar brud !

Met e vuhez eo , mad prizusan , a gollfe bremaik oc'h en em gannan .

- Roperzh , kont Flandrez , penn ar Friziz hag ar Flamanked , lesanvet " Lans ha Kleze ar Gristenien " diouzh e vrud da vezan dizaon !

- Ar Roparzh all , hini eus Normandi , en doa lezet gouarnamant e brovins d'e vreur Gwilherm ar Ruz . Heman , ken plijet anezhan d'en em zizober diouzh an Dug , hag o lakaat arc'hantiri an holl ilizoù e vro da deuzin , en doa kavet 'vel-se peadra d'e leuskel da vont kuit : dek mil mark arc'hant !

" Ken ker 'vit gwir ' gouste kement tra ' veze talvoudus d'ur varc'heger 'vit ar brezel , na c'halle ket bout a-walc'h alies dezhan priz e c'hlad da baean harnez e jav .

Mennet ' oa rak-se un darn vuian anezho gwerzhan tamm pe damm , zoken d'ur priz dister , o domanioù .

Ha 'vit em lakaat e pourchas da stourm ouzh ar re zivadez , ne dermas ket tud all diboellet , met piv en defe klasket abeg enno , da breizhan bourc'hioù ha kêriadennoù !

Eus ezhomm hollek aour hag arc'hant e reas o mad prinsed an Iliz , dichek-bras evito , a glaske dont pinvidikoc'h c'hoazh o ferc'hennan dalc'hoù ha prinselezhioù ar re a gase d'ar Groaziadeg !

" Doareoù kaer hon doa hon-unan , aotrounez Vreizh , war hon mirc'hed-emgann palanchet gant mezher gwenn , brizhennoù erminig ha kroazioù du warno a bep tu !

Ne zeuas ket a-benn alouberezh Bro-Saoz , koulskoude , d'hon pourvezan eus kement tra ' oa ret dimp da vrezelin , hag en em voazet e vezemp d'arboellan .

Eus pep tra ' oa bet graet preder , dreist-holl eus dilhad en-dro dimp :

- botinezoù houarnet pe gant dir , bet hiraet anezho gant beg ur gentr ; brageier mailhet gant dir ivez ; saeoù-vailhek , bet graet jakoun anezho war un dro ; rochedoù-houarn dreist d'hor saoù-vailhek ; tirennoù koad pe skoedoù gant lêr pe houarnet ; klezeier gant beg ha goafioù ; togoù-houarn pe helmoù .

" Kaeran Aotrounez ' zeuas ganimp

e-leizh : Milez Braïz , Rotrou Perch ha Ralf Gwader ; Evrard Puizé , Acharz Monmerl , Isward Muzon ... da venegin un nebeud anvioù bennak hepken 'barzh roll ar re na zeuont ket en-dro biskoazh d'ar gêr ! ( 15 )

Ha 'vel ' m eus laret dit endeo , ' veajas gant o gwragez hag o bugale darn vrasan tudjentil an noblans . Pezh n'en doa mennet nepred hon Dug Alan Fergent , na 'vitan , na 'vit e re . "

( Da Vezan Kendalc'het )

____

DAN AR WERN - An Erbeder ( Kentan Kelc'h ) - VIII - Brezel ar Groaz - Trede Lodenn - 11 - An Aotrou Brekilien ( 8 ha 9 ) - Pep gwir miret strizh - All rights reserved - Tous droits réservés . "An Erbeder " ( Le Passeur des Mondes ) , copyright 2005 SGDL / Dan Ar Wern hag Arbredor.com 2007 ha 2008 ( Numerical Version ) - Breton Version / E Brezhoneg .

____

Notennoù :

15 - " Istor ar C'hroziadegoù " ( Histoire des Croisades , 1812 - 1822 ) gant Joseph-François Michaud ( 1767 - 1839 ) , istorour gall , ezel eus Akademiezh Bro-C'hall .

Partager cet article

Repost0

NUA-TARA - Table des Matières .

LE LIVRE DE VIRGINIA - I - Résumé de " Mourir à Ermioni " .

Retour à l'accueil

Commenter cet article