TREIZH ( Dastumadenn divyezhek ) - I - Dremmoù Aelezed - 1 - Malout .

14 Juillet 2022 , Rédigé par Dan Ar Wern Publié dans #TREIZH - TRAVERSEE

TREIZH

( Dastumadenn divyezhek )

I - Dremmoù Aelezed

1 ) Malout

Kalz goulennoù ' vez graet a-zivout ar Garantez .

Ha genel a ra " 'vel ur pennglaou o luskellat dre an aezhenn war veg ur bann loar

o skedin " pa vez paret warnimp , enkrezet , selloù he loargann kevrinus dre ar prenestr hanterdigoret ? ( 1 )

Pe ez eo keal eus ur gejadenn dre zegouezh bet graet en un ostaleri Biarritz e-pad un abardaez Mae , o laka ac'hanomp o talin ouzh un dremm aelez hoalus ganet eus ur rez dibad , he tres dreistlavar , luc'hedenn a entano ho kalon da viken , o redek buan e oabl ur vuhez tenval evel liv an noz du ?

" Holl atizoù ha froudoù a dremeno gant an oad ? " ( 2 )

Piv en deus laret-se en ur dremen en ur sapreg , e " Bro Kollet Meaulnes Veur " , o vale en alez an envorennoù diwalc'h ur gontadenn ken hoalus hag hini ur bapa ?

Plijout a rae din istor Hervine Magon " a c'hoarzhe gant plijadur , a ouele gant an aon " , e-barzh " Kounskridoù eus an Tu- Hont

d 'ar Bez " ( 3 )

Komz a rae eus va bugaleaj din-me va-unan hag o lenn anezhan e tegase d'am c'houn adarre un dousig-koant mod Breizh anvet "Malout " , prinsezig melen he blev a vale kazel-ouzh-kazel gant he marc'heg kadarn , heman o tougen ur sae-foutouilhat hollgaer nepell diouzh lez hengoadeg

vojennel Vrekilien !

Bez' ez eus ul luc'hskeudenn gozh a ziskouez ac'hanomp gant hor falsjaved , div velo bugelien .

A-drugarez dezhi eo dasorc'het dre vurzhud holl skeudoù va zremened : hon troioù-kaer pa'z aemp da vreskenn ha da riboulat gant va c'hoar Marianig , pennrenerez ha penn-paotr gwirion hon tropell e-giz ur Markiz Pontkalleg * nevez , marteze , am stleje bepred dre gaer pe dre heg 'dreuz al lann war he lerc'h , hep menegin va hiraezh 'vit gouelioù Nedeleg gwechall-gozh hag e c'hoarielloù artizan ...

L'Îlot Haut , Bellevue : degouezhout a ra d'an anvioù-man dassenin c'hoazh em fenn ; Kamp Koetkidan e ospital an arme gant ur groaz vras wadlivet warnan

( hini an Demplourien ? ) a welan anezhan bepred dirak va daoulagad .

Ha zoken ma n'eo ket an Aotroù Brekilien o vont kuit d'ar Groazadeg war e varc'h-emgann feal , eo din a-walc'h ur soudardig plom war un estajerenn , marc'heg Sant-Sir meurdezus gant ur glipenn plunv gwenn-ruz war c'horre e chako , 'vit lakaat da skedin em noz livioù hud va bro c'henidik ! ( 4 )

( Da Vezan Kendalc'het )

___

DAN AR WERN - TREIZH ( Dastumadenn divyezhek ) - I - Dremmoù Aelezed - 1 - Malout ( 2006 ) - Pep gwir miret strizh - All rights reserved - Tous droits réservés . " TREIZH ( Traversée ) " , copyright 2022 .

___

Notennoù :

1 - " War Glask an Amzer Gollet " ( A la Recherche du Temps Perdu ) , I - " Da Du an Aotroù Swann " ( Du Côté de chez Swann , 1913 ) , 1 - " Kombre " ( Combray ) , gant Marcel Proust ( 1871 - 1922 ) .

2 - " Ar Skinoù hag ar Skeudoù " ( Les Rayons et les Ombres , 1840 ) - XXXIV - Tristidigezh Olimpio ( Tristesse d 'Olympio , 21 a viz Here 1837 ) gant Victor Hugo ( 1802 - 1885 ) .

" Pozioù pe Bedergwerzennoù da Gemer Plas re Pibrak o deus aet da Gozhan un Tamm " ( Stances ou Quatrains , pour tenir lieu de ceux de Pibrac qui ont un peu vieilli ) ,

XXXVIII , gant Voltaire ( 1694 - 1778 ) , prederour , skrivagner gall .

3 - " Kounskridoù eus an Tu-Hont d 'ar Bez " ( Mémoires d 'Outre-Tombe , 1809 - 1841 ) , I , 5 , gant François-René de Chateaubriand

( 1768 - 1848 ) .

4 - Tro-Vale e Bro ar Skeudoù / Balade au Pays des Ombres ( Heuliad ar Sterenn IV ) , I , 4 - Gilliatt hag ar Vorgazhenn - Copyright 2018 Dan Ar Wern / Edilivre - Tous droits réservés .

- An Erbeder / Le Passeur des Mondes

* Clément-Chrysogone de Guer , Markiz a Bontkalleg

( 1679 - dibennet e Naoned d'an 26 a viz Meurzh 1720 ) , a gemeras ur perzh bras en un irienn vreizhek 1718 o tennan da ziskar gouarnamant Fulub II Orleans , Rejant Rouantelezh Bro-C'hall etre 1715 ha 1723 goude marv Loeiz XIV. Brudet e oa bet da c'houde dre werz

" Maro Pontkalek " ( I , 46 ) ar " Barzaz Breiz " ( 1839 ) gant Kervarker ( Théodore Hersart de la Villemarqué , 1815 - 1895 ) , gant " Ur Verc'h digant ar Rejant " ( Une Fille du Régent ", 1845 ) romant Alexandre Dumas , hag ivez gant film Bertrand Tavernier , " Krogomp gant ar Fest ... " ( Que la Fête Commence ... , 1975 ) gant Philippe Noiret