TREIZH ( Dastumadenn divyezhek ) - I - Dremmoù Aelezed - 3 - Rozenn .

18 Juillet 2022 , Rédigé par Dan Ar Wern Publié dans #TREIZH - TRAVERSEE

Louis XVII ( 1785 - 1795 - 1845 ? )

TREIZH

( Dastumadenn divyezhek )

I - Dremmoù Aelezed

3 ) Rozenn *

Da Agatha Christie

" Bet 'vo o c'harantez un ober gorrek 'vit lezel da baouez o emglev touellus diganto ,

Hag o lakaat lev e darempredoù etrezo , he zrein da vurzhud un disrann meur . "

" Dizurzh Nevez ar C'harediged " ( Le Nouveau Désordre Amoureux )

Pascal Bruckner , Alain Finkielkraut .

" Ur bleiz diwar ar stepinier dianket du-man er c'herioù bras ma vez renet

buhezioù-strollad enno ... "

" Bleiz ar Stepinier " ( Steppenwolf )

Hermann Hesse .

1 - An Dec'hadez

" War va gwele da noz ,

'Meus klasket hini 'gar

Va c'halon ... "

Kantik , 3 , 1 .

Poan galon , skuizhder ?

Da zerc'hent noz Nedeleg , e tigerias ti he bro genidik 'vit mont da drec'hin war ar bed :

goude sellout pizh , n'eo an den nemet un tamm ene kollet war an Douar , neketa ?

- Diboellachoù , a esaeas da zisklerian dezhi he " boy-friend " , pa sonjer e c'hoantegezh fall an uhelidi-se a sonas glaz ar marv 'vit Breizh en amzer hon Dug Fransez II ! ( 1 )

Du-hont , he doa kejet he sell gant hini a save c'hoazh kestell el Loar !

- Ober a rez politikerezh da gaout

tri dre gant ?

- Ur gudenn uhelvennad eo , n'hallez ket kompren !

O sentin ouzh Balzac , marteze , ouzh c'hoant he re dreist-holl , goude marv reuzus he faourkaez stourmer , 'n em gavas hec'h-unan-penn ar Vreizhadez 'n ur gambrig barizian 'vel belegez un " templ ma teuio , diouzh Liszt , da vezan Doue an den 'vit ur c'hantved pe un eur ... " ( 2 )

Speredet-mat war a grede , e komze neoazh holl ar re-se eus paotred an EMSAV gant dismegans :

- Lamponed achu holl ! , a seblantas huchal genoù dilavar pilpouzed ar c'hanv . ( 3 )

Oc'h adwelout e zremm 'touez flammennoù al luskad 'pad he nozvezhioù digenvez , e ouias ober skouarn bouzar ouzh gevier niverus an dud a laras da c'houde n'e oa bet hervezo an emvodoù nemet un digarez dezhan 'vit mont da verc'heta !

2 - Hêr ar Gurunenn

" Kent ma c'hwezho aezhenn an deiz ,

Kent na dec'ho ar skeudoù ,

Deus en-dro ... "

Kantik , 2 , 17 .

Perak on ken trist

pa sonjan ennan ? , a lare alies dezhi hec'h-unan ar studierez-apotiker .

Kejet o doa un deiz e hall mont tre ar savadur .

Unan bennak jentil a-walc'h e oa koulskoude , un dentour a glevas diwezhatoc'h pa voe dizoloet kelan an den muntret gant

ul louzoù-lousk .

Edo o paouez bezan graet buhez dezhan e zousig , pebrenn amerikan an eil estaj , hag evel m'he doa Rozenn spinet e zivjod gant he bizied pa welas anezhan simudet o tifronkan , e zorn war hini he dor , e kerzhjont a-gevret betek tavarn korn ar straed .

Met p'en doa bet c'hoant da baean ur banne dezhi dre ziskulian e galon , e taolas pled ar plac'h yaouank ouzh e anv iskis .

- Labourat 'rit gant ar wiski ? , a c'houlennas dezhan gant un taol c'hoarzh kiez abafet , mezevellet gant he died krenv ha promesaoù ur garantez dibar nevez

( Ne baoueze ket da lugernin outi , a gave dezhi ) .

- Tamm ebet ! , a valbouzas neuze , kentoc'h war zousennoù-plastr pe ... vartezeadoù , 'vel ma karit , dimezell ... Sellout a reont gant fae ouzhin , o troukwiskan 'c'hanon dre guzh gant seurt gerioù !

A-dra-sur he doa klevet komz eus an afer Naundorff hag e istor bugel-roue tec'het diouzh an Templ . ( 4 )

- 'Vel ma c'hellfed ren e vuhez war vartezeoù , a gendalc'has paour-kaezh hêr ar Gurunenn , un druez e welet gant e zoare Herri IV !

He heulian 'reas hanter-vezv 'n he c'hambrig , o tiskouez dezhi goude ur c'hoari rev bennak etrezo ar merk ispisial 'n e c'henou a broue e orin .

Kredin a reas e zislavarout neoazh :

- Hag an TDN ? , en atersas ar vaouez ranezenn o ranellat muioc'h c'hoazh . ( 5 )

- Feiz'ta ! , a droc'has warni brouezet gant ur vouezh rok ,

n'eo ket 'vel-se 'man kont !

C'hoarzh goap din 'reont , ha kaeroc'h 'zo , e tremenan 'vit ur merc'hetaer ivez diouto !

" Stank-toull " 'vez graet 'c'hanon ganto bepred ! Meizan 'rit ? Va Zoue , ne zlefen ket larout-se dirazoc'h ! Met pa zalc'hit penn ouzh moger " Abeg ar Stad " , penaos ober ? , a eilgerias fuloret outi , o tiskouez dezhi e zent brav dre skopan war al leur-di !

... 'Vel ur " rodig rusian " eo deut va buhez ! , a zisoc'has kevrinus ar brientinig dianzavet 'benn ar fin . ( 6 )

Kenkoulz ha dirollan he gwarizi , e fromas kalz he c'halon Vreizh miz Ebrel kaer-dispar !

Siwazh dezhi , e adwelas anezhan distroet un deiz etre divrec'h an ez-daofinez !

O sonjal en Dukez Anna 'vit kaout un tammig frealz d'he foan ez eas buan he c'hounnar outan war un dro : evel m'en doa diskleriet ur wech he faour c'hariad bet dezhi , Doue d'e bardono , n'he defe ket dimezet roueig Bro-Frans ma vije bet tu dezhi ober un dibab en amzer-se !

Setu perak , o redek d'e c'hêr , e temptas Rozenn marteze an Diaoul evelato !

Ur banne diwezhan ho poe o-daou ...

Kavout a reas hi gwelloc'h nac'h e c'hoant hep digarez all ebet er wech-man koulskoude , o lakaat anezhan da dronin reuzeudik en e gador-vrec'h doare Loeiz Pemzek , dilezet gant an holl en e hunvreoù dreistdiraez ...

- Kompren 'rit , ul " loser " he doa graet ac'hanon ! P 'lec 'h 'man hi kuit , breman ? , a huanadas an den e-unan kent mervel .

3 - Ar Stourmer

" Diwisket 'm eus va c'hrezenn ,

Penaos he dougen adarre ? "

Kantik , 5 , 3 .

'Keit-se , pegen flour e lagad outi , e tegouezhas 'vel ur bleiz e lugaj he buhez skolveurel Ahmed , stourmer palestinat .

Hag-en da zisklerian feuls dezhi luziadennoù skoemp ur milendall Reter-Nesan :

- Klev'ta , n'omp ket 'vit en em gousk , ma vez sigotet ganto hon douar diwarnomp !

Ken mat e gwirionez e kleve ouzh seurt traoù-se ma ne gredas ket diskulian dezhan istor he bro , met penaos 'oa kontammet gwechall gant ar Rozenn an Aerouant a c'hoantae he lonkan kriz-bev a-benn-kaer !

( 7 )

Alies 'vez laret ne bad ket pelloc'h ar garantez 'get glizhenn nevez-amzer ...

Padal , e warant deoc'h e teue c'hoazh an daeroù da c'hlebian he daoulagad en deizioù goanv , ur pennad mat goude m'he doa klevet 'oa marv he mignon kalonek en un gwalldaol . Vae Victis .

ECHU

" ... Siwazh , n'o deus nemet tri dre-gant eus o emskiant dihunet . An hini en deus youl da stekin e zorn ouzh gwirionezioù meur ar bedoù diabarzh a zle dihunin e seitek ha pevar-ugent dre-gant emskiant menet kousket ennan ... "

Furnez Mab-Den - " Prezegennoù " gant Samaël Aun Weor ( 1917 - 1977 ) , skrivagner amguzh kolombian .

___

Notennoù :

1 - Fransez II ( 1433 - 1488 ) , dug diwezhan Breizh dieub ,

tad Anna Vreizh ( 1477 - 1514 ) .

2 - Lavaroù Franz Liszt e 1837 , meneget gant Brigitte François-Sappey en he oberenn : " Ar Sonerezh en Alamagn Romantel " ( La Musique dans l'Allemagne Romantique , Fayard , 2009 ) .

3 - An " Emsav " : hollad ar strolladoù politikel , sevenadurel hag an hiniennoù a c'houlenn ma vo doujet ouzh gwirioù Breizh hag ouzh re ar Vretoned ( Geriadur AN HERE , 2001 ) .

4 - Karl-Wilhelm Naundorff , marvet e Delft e 1845 , a lare e oa ar Roue Loeiz XVII tec'het diouzh an Templ .

5 - An afer Loeiz XVII ha dielfennadurioù TDN 1998 ha 2004 .

6 - Tr : Russian roulette .

7 - Laret eo bet e oa aet an dinaosored da get dre m'o doa plaouiet kement a vleunioù ken e vint bet deuet a-benn ar re-se da dalvezout o foanioù d'o vourevien ( a-hervez Idris Lahore en e bennad : " Denoniezh-Vred hag he Fezh er Bed " / La Psycho-Anthopologie et sa Place dans le Monde , er gelaouenn " Science de la Conscience " / Skiant an Emskiant , niv. 35 , Gwengolo 2009 ) .

* Aerouant Rozenn , Aman hag Ahont ( Ici et Là ) , 14 et " La Rose et le Dragon " , III - Copyright 2021 Dan Ar Wern / Dodo Books Indian Ocean LTD - OmniScriptum S.R.L Publishing Group - Editions " Muse " - Alle Rechte Vorbehalten .