AN ERBEDER ( Kelc'h Kentan ) - VIII - Brezel ar Groaz - 11 - An Aotrou Brekilien ( 15 - Astroù an Noz ) .

26 Janvier 2023 , Rédigé par Dan Ar Wern Publié dans #An Erbeder - Le Passeur Des Mondes

Roparzh II " Berr-e-heuz " ( Robert " Courteheuse " e galleg ) , dug Normandi , gant Henri de Caisne ( 1843 ) .

Kelc'h Kentan : Da Darzh an Deiz ...

An Erbeder ( VIII )

Trede Lodenn

/ Brezel Ar Groaz /

" Un Arouez kevrinus ' zo er Maen ,

Engravet don 'n E wad tanflamm ... "

Novalis - " Heinrich Von Ofterdingen "

- Ar Skarbouklen .

- Brezel ar Groaz -

11 - An Aotrou Brekilien

( 11 )

( Lizher Roll / Dornskrid ar Mestr )

" Palefarzhet an aour d'an unanvet ha pevarvet , e hoc'h-gouez spontet en sabel ; adpalefarzhet en arc'hant d'an eilvet ha trivet gant daou dour amzerioù aour kranellet gant pevar pezh en gul ha leinet gant peder vrizhenn en erminoù . "

Ardamezioù Brekilien

" Ar c'hwileien-raden n'o deus ket a roue hag ez eont er-maez holl dre vandennoù . "

Krennlavarioù , 30 , 27 - ( Ger ar Roue Salomon ) .

Istor Riou Lohieg

II - An Ergerzhadeg

15 - Astroù an Noz

" Ha padal , re zievezh 'oa pep tra a raemp-ni ivez , hag alies e teue dimp mont kuit war ar maez tro-war-dro da glask ur serc'h bennak 'vit hon diduellan un tamm 'hed devezhioù hir .

Krog ennan droug ar gêr , e hiraezhe an Aotroù Brekilien d 'hor bro c 'henidik pell , en arvar ma vefe tu dezhan d 'e adwelout un

deiz .

Petra 'oa deut hor c'herent , hon tiegezh da vezan ?

Ken oadet a-barzh deut kozh evit gwir , ha kiget er c'halvar-se hor c'halonoù gant amprouennoù ha stourmadegoù a-bep seurt , ne oa mui nemet spesoù ac'hanomp war hent hini an Aotroù ! 'Vel ne oa nemet Sterenn ur feiz dinerzh a c'halle hon henchan ivez hec'h-unan e-giz ur goudor pe ur skoazell

diwezhan ! Klask a rejomp anezhi 'kreiz stered o skedin en noz d 'an abardaez Nedeleg-man . Met e oa trist ar gouel a-benn ar fin , o vezan m'e doa hon dilezet ar spi da chom bev rak ur gernez vras er goanv kriz-se , hag e sonje eveldomp an uhelan Aotrounez , marteze , holl o vezan lusket gant ur c'hoant hepken , mont kuit !

Teir gwech 'oa bet great d 'an dug Normandi kemenn 'vit ma voe kendrec'het da zont en-dro d 'ar Groaziadeg en anv Jezuz-Krist hag hor Relijion santel , o vezan m'en doa c'hoant bras kentoc'h anezhan mont kuit da gavout Laodike !

O talan ouzh ar c'hlenved hag ar marv edomp , krignet hor speredoù gant an arvar , ha lakaet da gredin e vefe da dalvezout gwelloc'h egeto a bep seurt gwalinier etre ar gwashan ne voemp ket espernet ganto : mont da ribodal ha c'hoari vaouez pe n'eus forzh pe dra bennak all diroll ha lous a veze plegoù fall bet kouezhet warnomp re alies e-leizh !

Ne gavas ket mat marc'heg Koadkaden seurt traoù-se .

Ken dishenvel e teue da vezan bemdez , oc'h ober klemm eus traoù goullo ar bed , avel ha moged an douar 'vel ma lare , o varc'hegezh war leviadoù e jav feal , Righall , o klask ur repu dizarempred war ur menez digenvez , pe ur peniti bennak ma taouline ennan 'vit pedin Doue , o c'houlenn dibaouez Dezhan ster , na du na gwenn d 'e veno , holl an drailhoù , al lazhadegoù , ar berniadoù kelannoù , ar pennoù troc'het ken euzhus-se !

Neuze eo e c'hoarvezhas ur c'hren-douar da rein dezhan ur respont , bet klevet ivez gant pep hini ar birc'hirined . Hag un tarzh-gouloù boreel a ginnigas ouzhpenn dezho un arvest hollgaer diankouaus eus droug an Aotroù Doue !

Kemennet 'oa bet Grasoù da derrin e nerzh , ha pinijenn 'oa bet graet da c'houde . "

( Da Vezan Kendalc'het )

____

DAN AR WERN - An Erbeder ( Kentan Kelc'h ) - VIII - Brezel ar Groaz - Trede Lodenn - 11 - An Aotrou Brekilien ( 15 - Astroù an Noz) - Pep gwir miret strizh - All rights reserved - Tous droits réservés . "An Erbeder " ( Le Passeur des Mondes ) , copyright 2005 SGDL / Dan Ar Wern hag Arbredor.com 2007 ha 2008 ( Numerical Version ) - Breton Version / E Brezhoneg .